An dinna ngaiah HPC an la ding - sixth schedule an la beisei zel

#ZabilianZ May 14, 2026: HPC, Gen. Hqrs. Sakawrdai President Lalrosiem-a'n kum 1994-a Mizoram sorkar nen inremna an siam anga an dinna ngaia an la din reng thu sawiin, sixth schedule an hmuh theihna tura hma an lak zel thu a sawi.

Aizawl Press Club-a thuthar thehdarhtute a kawmnaah he thu hi HPC, Gen. Hqrs. President chuan a sawi a. Manipur Hmar Inpui, Mizoram Region inti te chu HPC chungchanga an inrawlh rem an tih loh thu a sawi bawk.

Manipur Hmar Inpui, Mizoram Region inti te chu pawl phuahchawp registered pawh ni lo, an hruaitute pawh Mizoram mi dik tak pawh ni lo, Mizo tawng pawh thiam tha lo, an mimal hamthatna zawng niin Lalrosiem chuan a sawi a. Hmar hnam tan tangkaina pawh an nei lo nia sawiin, "an ram Manipur-ah politics khel rawh se. Manipur Hmar Inpui Mizoram Region inti te hi HPC chungchanga an inrawlh kan remti lo" a ti.

Lalrosiem chuan HPC chu sixth schedule-a awm an duh avanga ramhnuaia lut an nih angin sixth schedule an hmuh theihna turin hma an la chhunzawm zel a, chawl thei an nih loh thu leh HPC din chhan ber chu Hmar hnam tan sorkarah sixth schedule neih a nih thu a sawi.#zabilianznews

Kum 1994-a Mizoram sorkar leh HPC inremna angin khaw 24-a Hmar school, primary level hawnna tur an dil mek nia sawiin, Hmar Art & Culture pawh tihpuitlin a nih theihna tura sorkara an bawhzui mek thu Lalrosiem chuan a sawi bawk.

HPC Gen. Hqrs. President chuan tunah hian Ramfangzaua (Fana), Sakawrdai leh Lalparkunga, Sakawrdai ten HPC (R), pawl phuahchawp an din nia sawiin, "anni hi mi rinawmlo tak an ni" a ti a. HPC hminga thil an tih pawh an remtih loh thu a sawi bawk a ni.#zabilianz #zabilianznews #zofatehuapzo