#ZabilianZ May 15, 2026: Central YMA Vice President hlui, 'Rualtin khumtu YMA' tih hla leh hla dang engemawzat phuahtu V. Thangzama chu nizan - May ni 14, 2026 (Ningani) zan dar 11:35 khan Aizawl Hospital & Research Centre-ah kum 92 mi niin a thi a. Vawiin - May ni 14, 2026 (Zirtawpni) chhun dar 12-ah Dawrpui Vengthar Presbyterian Kohhran Biak In-ah vui a ni ang.
V. Thangzama hi March ni 23, 1935 ah Ngopa-ah piangin Ngopa-ah hian a seilian a. pianpui unau 9 a nei. Kum 1960-ah Dawrpui nula Vanlalengi nen Dawrpui Presbyterian Kohhran Biak In-ah Rev. JM Lloyd-a'n inneihtirin, fa 5 (mipa 4 leh hmeichhe 1) an nei a. Tu 12 leh tuchhuan 1 a nei. A fapa Vanlalhruaia chu AMC Ward XIII-na bialtu Corporator niin, Executive Corporator a ni mek bawk.
Thu leh hlaa Zofate rohlu V. Thangzama hi kohhran leh khawtlang tana hlu tak, chanvo pawimawh hrang hrang chelh thin niin, a hna avanga Zoram pawna a awm laiin Zoram pawn Mizo Kohhran Upa a ni a, Mizorama a let leh hnu ah October ni 8, 1979-ah Dawrpui Vengthar Presbyterian Kohhran Upa atan nemngheh a ni. #zabilianznews
Kum 1977 - 1983 chhungin CYMA Vice President a ni a. YMA Sub. Hqrs. Lunglei-ah kum 1984 - 1986 thleng President ni leh in, Dawrpui vengthar branch YMA-ah office bearer a ni thin bawk.
Kum 1959-1961 chhung Mizo High School-a a thawh hnuah kum 1962-ah Assam Civil Service-ah lutin, Mamit BDO-in a awm a. 1966-a Mizoram a buai tak avangin Nowgong-ah BDO bawkin a awm chhunzawm a. Kum 1972-a Mizoram UT a nih hnuah Aizawl District ADC-a dah zui a ni. Hemi hnu ian Under Secretary niin, Dept' hrang hrang a enkawl hnuah LAD Director ni chhovin, a. Kum 1983-a Lunglei-ah Additional District Magistrate-in a awm leh a, kum khat chhung DC mawhphurhna a la nghe nghe.
Pathian fakna hla leh ramngaih hla leh a dang 44 phuahin, hla lehlin 17 leh a thluk siam engemawzat a nei a. 'Rualtin khumtu YMA' leh 'Tho la, ding ta che (Khuavel i la chhing ngei ang)' tih hla te phei chu YMA hla ti hiala sawi thin an ni.
0 Comments