#ZabilianZ May 30, 2026: Champhai District MJA President Lalhlupuia nimin - May ni 29, 2026 zing dar 7:30 khan Champhai damdawi in-ah cancer avangin a thi a, nimin vek chawhnu dar 3 khan vuiliam niin, Champhai venglaia a vuina hunserh hman a nih rualin Mizorama Press Club hrang hrangah sunna hun hman a ni a. Aizawl Press Club leh district dang Press Club-ah te Champhai District MJA President sun nan MJA puanzar a ngul chanve-a zar a ni bawk.
Champhai District MJA President a thi tih hriat a nih ve leh a vuina-a tel turin MJA General Hqrs., Aizawl atangin President Vanlalrema Vantawl, Vice President C. Lalhmachhuana, Treasurer Zohmingmawia leh Executive Member Vanlalruata ten Champhai an pan nghal a ni.
Kum 65 mi Lalhlupuia hi Accredited Journalist niin, All India Radio (Akashvani, Aizawl)-ah kum tam tak Correspondent hna thawkin, a hun tawp thlengin he hna hi a thawk a. Chhawkhlei Daily Newspaper leh Chuailo Daily Newspaper (Lenrual chanchinbu ni ta) te a enkawl bawk. Kum 1998 a Champhai Journalist Assn. (CHJA) a lo pian khan, a dintutute zingah telin Secretary i/c. Organisation hmasa ber a ni a. MJA Champhai District-ah kum 1991, 2000, 2010-2012, 2014-2016, 2024-2026 bakah 2026-2028 term kallai ah te President a ni.#zabilianznews
Kum 1987-ah Lalrikhumi nen Champhai Venglai Presbyterian Kohhran-ah inneiin, fa panga (mipa 3 leh hmeichhe 2) an nei a, an fapa 3 zinga 2-in chatuan ram pan tawhin, tu 4 an nei bawk.
Pachhunga University College atanga Graduate-in, Holy Cross School, Champhai, Govt. Roseland Middle School leh Primary School-III, Champhai Venglai-ah te zirtirtu hna a thawk tawh a. Zirtirtu hna chu bansanin chanchinbu khawvelah a zuanglut a ni.#zabilianznews
YMA lam pawh theihtawp chhuahtu niin, Branch leh Joint, YMA-ah Office Bearer leh Group YMA leh Sub-Hqrs. YMA Executive Member a ni tawh a. Champhai Venglai indan tirh atangin Branch YMA dintute zingah telin, President leh Vice-President a ni tawh, kum engemzat Adviser a ni bawk.
Champhai khua VC pakhat hnuaia a awm lai, kum 1993 ah VC member atana thlan a ni a. Electric leh Venglai inkawp laiin vawi 2 thlan ni lehin, Venglai VC pian hnu ah vawi 4 thlan ni leh tawhin, kum 2009-2012 ah VCP a ni nghe nghe.#zabilianznews
Champhai District a pian theihna tura sulsutute zingah telin, Mizoram sorkar dawrtute zingah a tel thin a. Heng bakah hian pawl hrang hrangah chanvo pawimawh tak tak a chelh tawh bawk.
Kum 2024 December ah insawisel tanin, pumpui hnun cancer a ni tih hmuhchhuah a ni a, April 2025 ah Civil Hospital, Aizawl-ah zai niin, a theih ang anga enkawl chhoh ni mahse nimin zing dar 7:30 khan chatuan ram a pan ta a ni.#zabilianz #zabilianznews #zofatehuapzo
0 Comments