Champhai Zote khawtlang leh AR innghirngho - AR an chhuak

#ZabilianZ May 14, 2026: Champhai Zote khawtlang leh Assam Rifles te inkara inhmuhthiamlohna thleng avanga Zote khawtlangin Assam Rifles te an duty post chhuahsan tur leh insawn tura an tih hnu-ah nizan khan Assam Rifles te an insuan chhuak.

Champhai Zote atanga thudawnnain a sawi danin, Thawhlehni zan dar 8 vel khan Champhai Zote leh Ngur khaw inkara Assam Rifles duty, uniform ha lo, silai leh chem keng ten Zote VC member Vanlalhruaia Sailo leh Lalhriatrenga te ram kal hawn lam lo manin an phuar bet a. Vanlalhruaia Sailo chu kutthlakin, a lû ah hliam tenau a tuar nghe nghe a. Lalhriatrenga chuan an VC Secretary Lalmuanawma hnenah harsatna an tawh thu phone hmanga a hriattir hnu ah Zote khawtlang thinrim chu an khawtlang hruaitu ten harsatna an tawhna lam chu an pankhawm a, boruak chhe zawk a thlen hmain khawtlang hruaitu ten mipui an khap dai thei thung.

Champhai Zote mipui chuan an khaw bul maia Assam Rifles-in duty post an neih mek chu thiat tur leh he hmun hi chhuahsan nghal turin an phut a. Assam Rifles lam pawhin nizan khan an bungrua leh thil pawimawhte thiar chhuak nghalin, duty post building leh an puan in te erawh chu Champhai Police-in an veng zui rih niin thudawnna chuan a sawi bawk.#zabilianz #zabilianznews #zofatehuapzo