Congress kaihhruai sorkar hmalakna chhunzawm vangin MPCC PAC Member-in ZPM kaihhruai sorkar chungah lawmthu a sawi

#ZabilianZ May 25, 2026: MPCC PAC Member Joseph Lalhimpuia'n Tuirini Hydel project chhunzawm a nih avangin ZPM kaihhruai sorkar chungah lawmthu a sawi.

Congress party political session, Congress Bhavan, Aizawla neihah he thu hi vawiin khan MLA hlui Joseph Lalhimpuia chuan a sawi a. Tuirini Hydel Project bultantu chu Congress kaihhruai sorkar a nih thu sawiin, kum 2018 Independence Day-ah hetihlaia Chief Minister Lal Thanhawla'n BRICS hnuaia new development tanpuina hmangin mega watt 24 pechhuak thei Tuirini Hydel project thawh a nih tur thu a puang tih a sawi a ni.

MNF kaihhruai sorkar thara Chief Minister Zoramthanga pawhin Rs. vbc 465 senna tur mega watt 24 pechhuak thei Tuirini Hydel project chu sorkar laipuiin a pawmpui tawh thu leh reiloteah hna tan a nih tur thu kum 2019 Independence Day-ah a puang tih Joseph Lalhimpuia chuan a sawi a. Hemi hnu kum 2020, June ni 4-ah Chief Minister Zoramthanga bawk chuan 'technically leh economically' pawha tihpuitlin rinlohna avanga Tuirini Hydel Project chu tihtawp a nih thu sawiin thuchhuah a siam ta daih nia sawiin, "pawisa dawn tawh pawh an kir ta hial a ni" a ti.#zabilianznews

Joseph Lalhimpuia chuan Congress hmalakna a nih avanga Tuirini Hydel project chu chhunzawm duh lo ah MNF chu a puhin, "chhunzawm se chuan a tam zawk zo tawhin, kan state in mega watt 24 kan ta liau liau power kan nei tur a nia, a pawi a ni" a ti bawk.

MPCC PAC Member, MLA hlui ni bawk Joseph Lalhimpuia chuan "Tuirini Hydel Project chu MNF kaihhruai sorkar-in kalpui hleithei lova pawisa dawn sa pawh a pekkir leh hial hnua ZPM kaihhruai sorkar-in Rs. vbc 767 senga a chhunzawm leh tur hi Congress party chuan lawmawm kan ti takzet a ni" a ti bawk a ni.#zabilianz #zabilianznews #zofatehuapzo