Mizorama lirthei 2284-ah VLTS vuah tawh

#ZabilianZ May 19, 2026: Passenger phur lirthei - taxi, maxi-cab, bus leh rental motor-a vuah vek tura tih - vehicle location tracking & emergency alert system (VLTS) chu Mizorama lirthei 2284-ah vuah a ni tawh.

He ruahmanna hi hmeichhia leh naupangte himna tura ruahmanna niin, vuah tura tihin a huam chin lirthei lei tharah te vuah nghal zel a nih thu Transport Dept. lam chuan an sawi a. A man a to deuh avangin lirthei hlui tawh deuhah erawh chuan harsatna an tawk niin an sawi.#zabilianznews

VLTS vuah lo leh tinung lo passenger phur chi motor te chu registration tih theih a ni tawh dawn lova, permit renew pawh a theih tawh dawn loh niin an sawi bawk.

Transport Dept. lamin an sawi danin, VLTS chu lirthei khalhtu leh a chuang te inkara dah thin niin, hmeichhia leh naupang harsatna tawk an awm chuan an hmet anga, command & control center-in lo hriain, emergency response support system (ERSS)-ah an lo hriattir anga, ERSS duty ten Police Station hnai berah hma la turin an hriattir ve leh thin ang.#zabilianznews

Mizoramah VLTS atang hian tanpui dilna ‘emergency alert’ vawi nuai 1, sing 5, sang 3, za 7 leh 26 a chhuak tawh nia sawi niin, heng zingah hian umzui ngai liantham erawh a la awm lo thung a. Lo hmet palh emaw, kut hlei vanga lo hmet emaw te an ni thin nia sawi a ni.

He ruahmanna hi sorkar laipuia Ministry of Road Transport & Highways-in October ni 25, 2018 a thupek a chhuah bawhzuina niin, October, 2022 atangin Mizoram sorkar chuan hma a la tan a. Command & Control Center pawh September ni 15, 2023 khan hawn a ni.#zabilianznews

Passenger phur chi motor, January ni 1, 2019 hnu lama lei te chu he thupek chhuah atanga thla 12 chhunga VLTS vuah tura tih an ni a, auto rickshaw leh 2-wheeler taxi te erawh chu hei hian a huam ve lo thung. Mizoramah chuan VLTS hi transport Dept. leh National Informatics Centre tangkawpin an buaipui a. Project pumpui man Rs. vbc 10.4 niin, sorkar laipui leh Mizoram sorkar-in zaa 90 leh zaa 10-in an intum sem a. Mizoram chu hmarchhak state zinga buaipui hmasa ber a ni.

He ruahmanna hi -Nirbhaya case- tia hriatlar, kum 2012-a Delhi-a bus chhunga pawngsual leh inthahna thleng vanga sorkar laipuiin, a bikin hmeichhiate himna atana a hmalakna a ni a. Ministry of Women & Child Development pawmpuinaa -Nibhaya Framework- vuaha project hi kalpui a ni.#zabilianz #zabilianznews #zofatehuapzo