Serchhip-a sorkar hmunhma hrang hranga vohbikte tana hmalakna endik - .PwD Commissioner-in Serchhip District Hospital leh Govt. Serchhip College te a fak

#ZabilianZ May 23, 2026: Accessible India Campaign hnuaiah Persons with Disabilities (PwD) Commissioner Vanlaldiki Sailo kaihhruai Access Audit Team-in Serchhip-a sorkar hmunhma hrang hrangah rualbanlo (vohbikte) tana awlsam zawka luh leh chhuahna an siam dan an endik.

Access Audit Team hian - DC Office, District Hospital, Govt. Serchhip College, Shalom Special School leh Govt. Serchhip Higher Secondary School-a vohbikte tana awlsam zawka luh leh chhuahna an siam dan an endik a. PwD Commissioner chuan vohbikte tan hmunhma nuam tak an siam hlawm nia sawiin, a bikin Serchhip District Hospital leh Govt. Serchhip College te chu vohbikte tana hmunhma buatsaih kawngah fakawm a tih thu a sawi.

PwD Commissioner chuan sorkar laipui duh danin sorkar pisa ah te, zirna in ah te, Biak In leh vantlang punkhawmna hmunah te vohbik te tan hmunhma nuam buatsaih zel a tul thu sawiin, wheelchair hman tulna hmun te, mitdel te tana braille tarna hmun siam dan te, mipui punkhawmna building hrang hranga an kalvelna tur hmunhma buatsaih dan tur ruahmanna - drawing te a sem bawk.#zabilianz #zabilianznews #zofatehuapzo