Skywalk leh Ropeway-ah chengkhatmah ka eiru lo - MNF sorkar-in an chhunzawm duh loh vanga pamtul a ni :John Rotluangliana

#ZabilianZ May 22, 2026: MPCC Vice President John Rotluangliana'n “mi thenkhat ten 'anticipatory bail a la a, a ngawi ta kar mai' te min ti a. Ka ngawi kar dawn reng reng lo” a ti a. "Skywalk leh Ropeway-ah hian min bei engang mahse, chengkhatmah ka eiru lo tih hi Pathianiin min hriatpui" a ti.

Congress party political session vawiina neihah he thu hi MPCC Vice President John Rotluangliana chuan a sawi a. Anticipatory bail a lak avangin tawngkam chhe tak taka beih a tawk nia sawiin, Skywalk leh Ropeway hna chu Congress sorkar lai, a changtu Minister a nih laia bultan a nih thu leh MNF sorkar-in chhunzawm lova ACB-a FIR thehluh a nih tak thu a sawi.#zabilianznews

Tunhnaiah chargesheet a nih tur thu leh anticipatory bail dil tura thurawn a dawn thu MPCC Vice President chuan sawiin, thil harsa tura an ngai loh laiin, anticipatory bail dilna chu political pressure a nat lutuk avanga an dan tur thu sorkar ukil ten an sawi niin a sawi a. Sorkar ukil te chuan theihtawpin bei mahse, ni 12.5.2026-ah anticipatory bail a lak tak thu a sawi bawk.

May ni 19, 2026-ah Court atangin chargesheet copy a dawng tih sawiin, an chargesheet-na chu 'Tourism Information Center sakna tur sum revise estimate a siamtir' tih leh Rajiv Nagar-ah Tourist Lodge sakna tur pawisa a divert tir' tih a lo nih thu John Rotluangliana chuan a sawi a. Rajiv Nagar-a Tourist Lodge chu sak zawh a ni tawh thu leh an hawn tawh thu sawiin, a bill erawh la pek zawh loh a nih thu a sawi a. Tourism Information Centre pawh Tourism Directorate bulah Office atana hman nghal ni se tih a nih avanga revise estimate siam a nih thu a sawi.#zabilianznews

Central project - Swadesh Darshan Project-ah Mizoram tan Rs. vbc 99 sanction a nih thu leh Rs. vbc 49 hmuh tawh a nih thu Tourism Minister hlui John Rotluangliana chuan sawiin, "he project-ah hian Skywalk leh Ropeway bakah hna hrang hrang 8 vel lai a awm" a ti a. Mi thenkhat ten Rs. vbc 49 chu Skywalk leh Ropeway atana hmang zo vek angin thuchhuah te an siam nia sawiin, "an hriatchian loh vang a ni" a ti.

Tourism Minister chuan he project hi MNF sorkar-in chhunzawm duh lova FIR thehlutin, harsatna siam a nih tak avangin central sorkar-in a rawn cancel a, Mizoram sorkar-in Rs. vbc 50 lai a chan phah niin a sawi a. "Tunah hian la sorkar ila kan thalaite hi Ropeway-ah an chuang anga, Skywalk-ah an kal tawh ang" tiin, "engvanga pamtul nge kan tih chuan MNF sorkar-in an chhunzawm duh loh vang kha a ni" a ti bawk.#zabilianz #zabilianznews #zofatehuapzo