CYMA hruaitu ten branch hrang hrangah YMA Day an hmanpui - President-in YMA Day-in inpekna thuk zawk thlen se a duh

#ZabilianZ June 15, 2026: CYMA hruaitu ten vawiin khan YMA branch hrang hrangah YMA Day an hmanpui a. CYMA President R. Lalngheta'n Muallungthu, Lengpui Model, Meriat leh Zotlang branch te a hmanpui.

CYMA Vice President Prof. Lalnuntluanga'n New Capital Branch-ah YMA Day hmanpuiin, Gen. Secretary Prof. Malsawmliana'n Chanmari West branch leh State veng branch Vairengte te a hmanpui a. Asst. Secretary SF. David Ngursangzuala 'n Aibawk branch leh Nausel branch te hmanpuiin, Treasurer Er. H. Duhkima'n Saichal branch leh Dam veng branch a hmanppui a. Finance Secretary M.S. Ralte-in Phulpui branch leh Hlimen branch te a hmanpui bakah CEC member ten branch hrang hrang an hmanpui bawk.#zabilianznews

CYMA President R. Lalngheta chuan hmun hrang hranga YMA member zawng zawng te YMA Day chibai bukin duhsakna a hlan a. "YMA Day hian ram leh khawtlang tana rawng kan bawlnaah inpekna thuk zawk min neih tir se ka duh a ni" tiin, V. Thangzama'n YMA nihna, 'chanhai, riangvaite puitu, thlafam lusun te hnemtu, Kristian eng chu an lo chhi, duhaisam chu hei ngei hi' tia a lo sawi chu vawngnung zel turin YMA member te a chah a ni.

YMA-in Pathian malsawmna a dawn nasat thu CYMA President chuan sawiin, "kan neih theih loh tur lirthei tam tak kan Sub-Hqrs YMA leh Group YMA ten kan dawng a. YMA kaltlanga ram rawng kan bawlnaah theihțawp kan chhuah zia hretute kaltlanga Pathian malsawmna kan dawn a ni" tiin, "Heng kan thil neih te hi kan hmun theuhah mipuite rawngbawl nana kan hman tur a ni" a ti.#zabilianznews

YMA Kumpuan 'Ruihhlo Do' chungchangah theihtawp chhuah tura YMA member te chahin, Central YMA hnuaia Central Anti Drugs Squad (CADS) pawhin mutmu pawh tuah mumal hman lo leh chaw pawh a huna ei thei lo khawpa theihțawp an chhuah thu a sawi.

Aizawl khawpui bik chu zone-10 a then a nih thu leh Zone Anti Drugs Squad (ZADS) ten ruihhlo do kawngah theihtawp an chhuah thu CYMA President chuan a sawi a. Sub-Hqrs. Group leh Branch YMA te pawhin theihtawpin ruihhlo an do mek tih a sawi bawk.#zabilianz #zabilianznews #zofatehuapzo