MPCC-in Chief Minister hnenah petrol leh diesel-a cess lak mek chu tun thla ral hmaa titawp tura ngenna ziakin an thlen

#ZabilianZ June 17, 2026: Mizoram Pradesh Congress Committee (MPCC)-in Chief Minister hnenah petrol leh diesel-a cess lak mek chu tun thla ral hma ngeia titawp tura ngenna vawiin khan ziakin an thlen a. An ngenna-in awmzia a nei lo a nih chuan hmalak zui zel an tum.

MPCC chuan khawvel hmun hrang hranga Oil man san chhoh zel thu leh India ram leh Mizoramah pawh petrol leh diesel man a pun chhoh thu Chief Minister hnena ngenna an thlenah chuan tarlangin "kan hriat theih chinah Mizoram-ah petrol leh diesel man a san ber tum a ni hial awm e" an ti a. Petrol leh diesel man a pun chhoh tak avangin mipui leh lirtheia eizawng tam takin harsatna an tawk chho mek nia tarlangin, mipuiin harsatna lian zawk an tawh zel loh na turin Mizoram sorkarin September 2024 atanga petrol leh diesel litre khat zelah social infrastructure & services cess Rs. 2 leh road maintenance cess Rs.2  a lak mek chu titawp rih turin an ngen a ni.

MPCC chuan "Mizoram sorkar-in petrol leh diesel-ah VAT (chhiah) tam tawk tak a lak sa reng tho avangin POL man tipung lehzual tura litre khat zela cess Rs.4 a lak belh mek hi mipuite zangkhai zawk nana sut turin MPCC chuan Mizoram sorkar kan ngen a ni" tiin Chief Minister hnena ngenna an thlenah chuan an tarlang bawk.#zabilianz #zabilianznews #zofatehuapzo