#ZabilianZ June 13, 2026: MPCC Sr. Vice President Lalnunmawia Chuaungo-in "ZPM sorkar hian mipui laka an intiamna tihlawhtling lovin, nasa taka an sawisel MNF sorkar thil tih thalo te an rawn ti ve vek" a ti.
Congress Bhavan-a political session nimina neihah he thu hi MPCC Sr. Vice President chuan a sawi a. "MNF sorkar kha mipui sum enkawl kawngah mipuite mit an tlun loh avangin kum 2023 inthlanpuiah mipuiin an hnawl" tiin, "Mipui sum dik leh fel taka enkawl leh hmang tura nasa taka intiam ZPM chu rorelna fawng chelh tura thlan tlin ni mahse, MNF sorkar thil tih thalo te an rawn ti ve ta vek tho a ni" a ti.
MPCC Sr. Vice President chuan kum 2026-27 budget Rs vbc sing 1, sang 7, za 4 leh 96.91 ah state-in chhiah leh a dang atanga a thawh chhuah ve tur Rs vbc 2759.75 (zaa 16 tling lo hret) a nih thu leh a dang zawng chu Central sorkar chhiah tlingkhawm atanga finance commission-in Mizoram chan tura a ruat leh central sorkar atanga tanpuina leh centrally sponsored scheme atangtea dawn tur te a nih thu a sawi a. "Mipui sum heti zozai kan dawn te hi a hmanna turah kan hmang em, tih leh a hman dan tur dikin kan hmang em, tih hi mipui ten rorelna fawng chelhtute kan zawt a ni" a ti bawk.
Lalnunmawia Chuaungo chuan "hlemhletna kawngah na taka tlan tumin an inhmakhua nasa tih hi ZPM sorkar tirh phat atanga kan aupui a ni" tiin, hlemhletna kaihhnawih thil chi hrang hrang te press conference neia an lo auchhuahpui tawh thu a sawi a. Congress party chu rorelna dik leh tha, education reforms, health sector reforms, NLUP changtlung zawk, administrative reforms hrang hrang hnuaiah mipui ten thuneihna leh mawhphurhna tam zawk an neih theihna tur te in an inhmakhua mek niin a sawi bawk a ni.#zabilianz #zabilianznews #zofatehuapzo
0 Comments