Mizo High Sikul Field chei that hna hi February ni 4, 2023-ah Lushai Engineers-in an thawk tanin, tun thla ni 10 khan an zova. Phul lem phah niin, meter 73.35 a thui, meter 33.12 a zau a ni.
Mi 310 thut theihna siam a ni a, field sir-ah ke-a kal na, cycle tlanna leh cricket practice pitch te a awm a. Stage, naupang infiamna hmun, open gym, huan, tui dahvawhna, inthiarna leh store room te a awm bakah Mizorama Biak in hmasaber dinna (6.10.1896) hmun a nih angin, Biak in hmasaber lem dah a niin, a hnuai lam chhawng hnihah four-wheeler 80 leh two-wheeler 47 dah theihba a awm a, litre 35,000 dawng tuizem, vantlang inthiarna leh security room te a awm bawk.#zabilianznews
Chief Minister Lalduhoma chuan he project hi sorkar hmasa-in bultana, tha taka a lo kapui chhohpui, an sorkar hnua an chhunzawm a nih thu sawiin, a bul lo tantute lawmthu a hrilh a. A tira project hming erawh chu kum tam tak Mizo High Sikul Field lo ni tawh leh infiammi tam tak chherchhuah tawhna a nih avanga hming dang puttir uiawm an tih avanga Mizo High Sikul Field ti-a an thlak thu a sawi.
A enkawltu tur management committee-ah sorkar aiawh, Zarkawt Local Council, tlawmngai pawl hruaitute leh Mizo High School Principal te an tel dawn tih sawiin, Chief Minister chuan - Mizo High Sikul leh HSS, Zarkawt LC, Zarkawt-a NGO leh Zarkawt Presbyterian Kohhran ten a thlawna an hman theih tur thu a sawi a. A hnuaia lirthei dahna hmun enkawl hna pawh Zarkawt Local Council kuta awm tur a nih thu a sawi bawk.#zabilianz #zabilianznews #zofatehuapzo
0 Comments