#ZabilianZ Sept 19, 2026: Minister of State hlui Nihar Kanti Chakma-a'n Tlabung chu Chakma te khaw hlun (homeland) leh 1898-a British rorelna hnuaia rinluh a nih hma chuan Chittagong Hill Tracts-a bet anga a sawi chungchangah ngaihdam a dil.
Nihar Kanti Chakma chuan Aizawl press club-ah thuthar thehdarhtute kawmin, vawiin khan a thusawi chungchanga ngaihdam a dil thu hi a sawi a. A phone-a artificial intelligence (AI) hman tangkai tuma a inzirna lama a thil hmuh a sawi chu thil pawi tak a nih thu sawiin, Tlabung chu Chakma te khaw hlun angin a sawi a, British rorelna hnuaia Mizoram a awm hma phei kha chuan helai hmun hi Chittagong Hill Tracts-ah betin Chakma te luah chin ram niin a tarlang niin a sawi.
Tlabung YMA-in MLA hlui hi a thusawi chungchanga thupha chawi tura an tih angin thupha a lo chawi tawh a. Hemi hnua All India Chakma Student Union-in a thusawi behchhana thuchhuah an siam leh chu a hriatpuina a nih loh thu Nihar Kanti Chakma a sawi.
Tlabung Welfare, Aizawl-in September ni 10, 2026-a an lenchilh thu leh press conference kova ngaihdam dil tura an ngen anga press conference chu ko ta a nih thu a sawi a. Heng zawng zawng lo thlen chhan chu amah vang nia sawiin, a thupha chawina chu Tlabung khawtlang leh welfare ten an pawmsak theih chuan a lawm hle tur thu a sawi bawk.#zabilianz #zabilianznews #zofatehuapzo
0 Comments