Kum 25 hnu ah Sensiari II siam dawn

#ZabilianZ Oct 01, 2026: Mizo film lar leh hlawhtling tak, kum 2001-a tihchhuah Sensiari chu kum 25 hnu ah Mizoram States Aids Control Society (MSACS) hmalaknain part II siam a ni dawn.

Sensiari II siam a nih tur thu hi MSACS Project Director Dr. Jane Ralte-in vawiin khan Aijal Club-ah a puang a. Kum 25 liamtaa Health department bultuma siam Sensiari chu MSACS bultumin HIV/AIDS do kawnga inzirtina lam hawia chunzawma Sensiari II siam a nih tur thu a sawi.#zabilianznews

Sensiari II ah hian Mizoram pawna film festival-ah te pawh ngaihhlut hlawh phak Mizo film te lo siam tawh Raymond Colney chu Director a ni dawn a. Mizo film industry-a hriathlawh tak tak - Tommy Rosangliana, Lalhmingchhuangi leh Louis Hauhnar te pawh Sensiari II ah hian kan hmu dawn a, zaithiam Rokhumbeu leh Sensiari OST-a aw thawhtu Henry K Thanzauva te pawh tel tura beisei a ni.

MSACS Project Director Dr. Jane Ralte chuan "Mizoramah HIV/AIDS a hluar zel a, India ramah kan sang fal hle a, national average let 15 zetin kan sang" a ti a. Mizorama HIV hrik inkaichhawnna tam ber chu mipat hmeichhiatna a nih thu leh fimkhur dan inzirtir nasat a tul thu a sawi.#zabilianznews

Kum 2001-a Sensiari tihchhuah a nih hunlaia HIV inkaichhawnna tam ber chu ruihhlova inchiuna hriau thianghlimlo vang a nih thu Dr. Jane Ralte chuan sawiin, "tunah erawh chuan mipat hmeichhiatna atangin kan inkai tam ber tawh a, inzirtirna thar kan mamawh hle" a ti a. "Entertainment kaltlanga zirtirna kan inpek theihna tura Sensiari II hi ruahman a ni" a ti bawk.

Sensiari II siam a nih tur thu puanna ah hian Sensari Director Pu Sangzela Tlau hovin a changtute pawh an tel a ni.#zabilianz #zabilianznews #zofatehuapzo