Sorkarin duh anga SEDP a kalpui theih loh chhan chu Covid hrilengin sum harsatna a thlen vang a ni :Lalruatkima

 #ZabilianZ June 29: MNF Adviser, I&PR Minister ni bawk Lalruatkima'n sorkarin duh angin SEDP a kalpui thei lo nia sawiin, a chhan chu Covid hri leng vanga sum harsatna a thlen vang niin a sawi.

Aizawl West II bialtu MLA ni bawk Lalruatkima chuan vawiina Aizawl West II MNF Block political training, Dinthar Veng LC House-a a hmanpuinaah he thu hi a sawi a. Covid hrilengin sum harsatna a thlen dan sawiin, "Kan budget-a sum ruahman Rs vbc 3,000 chuang kan hmu thei ta lova, central sorkarin sum pek dan leh hman dan thar a ruahman tak avangin kan ruahmanna siam tam tak kan hmu thei ta lo a ni," tiin, "tu te pawh sorkar se hetiang hun harsaah hian an duh ang diak diaka an kalpui theih a rinawm loh" a ti bawk. 

Lalruatkima chuan mipuiin SEDP an hriat dan leh beisei dan a inanglo nia sawiin, SEDP-ah vantlang huap hmasawnna tur bilh tel a nih thu a sawi a. SEDP chu kawng hrang hranga hmasawnna kalpuina nia sawiin, kum 2021 atangin family oriented-a kalpuia phase-I sem zawh tawh a nih thu leh phase-II pawh kumin July thla chhunga sem tur a nih thu a sawi.

"Central sorkara kan ram hmasawnna tura hma la ngam Chief Minister Zoramthanga kan nei a, a hmalakna zarah SASCI pawh hmuh theih tawh loh tura kan rin hnuah second phase kan hmu leh ta hi thil lawmawm tak a ni," Lalruatkima chuan a ti bawk.