MLA inthlan campaign-in a vawrtawp thleng chho mek - November 5 tlai dar 4-ah campaign theih hun tawp dawn

#ZabilianZ Oct 30: Mizoram MLA inthlan atana campaign-in a vawrtawp a thleng chho mek a. Party hrang hrang te leh independent candidate te pawhin campaign hun a tawi tawh avangin thapui an chhuah chho tak tak ta hlawm.

MLA inthlan lo awm tur atana campaign theih hun chhung chu vote thlak theih hun tawp November ni 7, 2023 tlai dar 4 atanga chhiarleta darkar 48 - November ni 5, 2023 tlai dar 4-ah a tawp dawn a. Hemi hnu hi chuan chanchinbu leh media dang hmanga campaign kaihhnawih thil tihchhuah pawh phal a ni dawn lo.

Inthlan campaign theih hun tawp November ni 5, 2023 tlai dar 4 hnu lamah chuan campaign-a chhuak zawng zawng te pawh vote an neihna bial pawn lama an awm a rem tawh dawn lo bawk.

MLA inthlan lo awm turah hian INC, MNF leh ZPM chuan Mizorama bial awm zawng zawng bial 40 an chuh kim dawn a. BJP-in bial 23; AAP-in bial 4 bakah Independent candidate 27 an awm. Candidate 174 awmin, an zinga 156 chu mipa niin, hmeichiha 18 an ni a. Bial hniha ding kawp mipa 2 leh hmeichhia 2 an awm.

Candidate tam ber na Aizawl North III, Aizawl South I, Serchhip leh Lunglei West bialah te candidate 6 theuh an awm a. Candidate tlemna Tawi, Champhai South, East Tuipui leh South Tuipui bialah te candidate 3 theuh an awm thung.

Kumina MLA inthlan lo awm tur atang hian polling station pan harsat te, kum 80 chunglam leh rualbanlo ten in atanga vote an thlak theihna tur 'Home Voting' kalpui tan a ni dawn a. Chief Electoral Office CEO)-in a chhinchhiah danin home voting ti thei tura an dilna pawmsak zat Mizoramah mi 2095 an awm.

CEO-in a chhinchhiah danin home voting ti thei tur tam berna chu Serchhip bial niin mi 119 an awm a, Aizawl North III bialin dawtin mi 115 an awm a, Tuichang bialah mi 112 awmin, Aizawl North I bialah mi 103 an awm.

Home voting ti thei tur Hachhek bialah 11; Dampa bialah 25; Mamit bialah 10; Tuirial-ah 31; Kolasib-ah 20; Serlui-ah 38; Tuivawl-ah 68; Chalfilh-ah 33; Tawi-ah 69; Aizawl North II ah 79; Aizawl East I ah 54; Aizawl East II ah 68; Aizawl West I ah 65; Aizawl West II ah 83; Aizawl West III-ah 51; Aizawl South I ah 83; Aizawl South II ah 88; Aizawl South III-ah 59; Lengteng-ah 54; Champhai North ah 52; Champhai South ah 30; East Tuipui ah 11; Tuikum ah 30; Hrangturzo ah 25; South Tuipui ah 53; Lunglei North ah 63; Lunglei East ah 29; Lunglei West ah 33; Lunglei South ah 65; Thorang ah 5; West Tuipui ah 3; Tuichawng ah 15; Lawngtlai West ah 11; Lawngtlai East ah 79; Siaha ah 69; Palak ah 84 an awm a ni.

Final Electoral Roll-a a lan danin Mizoram-ah voter 857063 an awm mek a. Heng zinga 413062 chu mipa niin, hmeichhia 439026 an awm a. Service voter 4975 an awm bawk.