Thlan nawn tlaka min ngaih chuan ka lawm a, thlan nawn tlaka min ngai lo a nih pawhin ka dem chuang lo che u :L. Thangmawia

#ZabilianZ Oct 30: Lengteng biala MNF Candidate, bialtu MLA nilai Dr L. Thangmawia'n "Inthlan hmasa lamah min enchhin ve teh u, tiin inkhawngaihna dilin helai hmunah hian ka rawn ding tawh a, in mi khawngaih leh duhsakna dawngin MLA ka lo ni ta a, thlan nawn tlaka min ngai a nih chuan ka lawm a, thlan nawn tlaka min ngai lo a nih pawhin ka dem chuang lo che u" a ti.

Ngopa khuaa Street Campaign-ah he thu hi vawiin khan Dr. L. Thangmawia chuan a sawi a. Bial tam takin bial mi ngei candidate an neih theih loh laiin Lengteng bial-ah chuan bial chhung mi ngei candidate mi 3 an awm thu sawiin, "tupawh lo tling sela Ngopa khawtlang tan hian theihtawp an chhuah ka ring a, bial chhung mite thutlukna apiang chu ka pawm a ni", a ti bawk.

Covid hri leng leh harsatna dang dang ten tlakbuak mahse, Lengteng bial hmasawnna turin theihtawp an chhuah tih sawiin, a hlawhtlinna pawh tam tak hmuh tur a awm thu L. Thangmawia chuan a sawi a. Sorkar hmasain bul a lo tan tawh tipuitlin zui tak pawh engemawzat an neih thu a sawi.

L. Thangmawia chuan hmasawnna hna kallai engemawzat pawh thlan tlin leh a nih chuan reilotea tihpuitlin leh theih tur te a nih thu a sawi a. Nakuma Ngopa-in KTP General Conference a thlen tur puala project pawh fel mai thei a nih tawh thu sawiin, Chief Minister pawhin a recommend that thu leh Rs. nuai 200 emaw 300 emaw vel tangkai taka hman tura a tihsak theih tur thu a sawi bawk.

Bialtu MLA nilai L. Thangmawia chuan party mipuite fuihin "MNF chuan inngaihtlawmna hnathawh kawr rit tak kan inbel a ni tih hriaa, kan tlin pawhin kan tlak pawhin khawi hmunah mah kan chapo tur a ni lo" a ti a. Covid tel lo term khat pe leh turin bial mipuite khawngaihna a dil bawk a ni.