ECI-in Exit Poll leh Opinion Poll lak khap chungchang puang nawn

#ZabilianZ Nov 03: Election Commission of India (ECI)-in MLA inthlang tur state 5 - Chhattisgarh, Madhya Pradesh, Mizoram, Rajasthan, Telangana leh MLA bye-election neihna tur Nagaland-a Tapi bialah te exit poll lak khapna chungchang a puang nawn.

ECI chuan danin a sawi angin ECI-in hun tiam a ruat chhungah print media emaw electronic media emaw eng hmang pawha exit poll buatsaih leh a result thehdarh khap tlat a nih thu a puang nawn a. MLA inthlanpuiah leh hmun khata bye-election emaw, hmun khat aia tama a ruala bye-election neih a nih pawhin vote thlak ni hmasa bera vote thlak tan hun darkar atanga intanin, vote thlak tawpna ber state/bial emaw Union Territory-a vote thlak tawp hnu darkar chanve thleng a huam thu a tarlang.

He dan bawhchhia te chu kum hnih thleng lungin tan emaw lei chawi tir emawa hrem theih an nihy thu ECI chuan a sawi a. A pahniha hrem kawp theih an nih thu a sawi bawk.

Danin thuneihna a pek angin - November ni 7 (Thawhlehni) zing dar 7 atanga November ni 30 tlai dar 6:30 (Ningani) thlengin print media emaw electronic media emaw eng hmanraw hmang pawha MLA inthlanpui/Bye-Election kaihhnawih exit poll neih leh a result puanzar chu Election Commission of India chuan a khap a ni.

MLA inthlanpui/Bye Election neihna state-ah te vote thlak tawp hun atanga chhiarleta darkar 48 chhung chuan inthlan kaihhnawih opinion poll emaw mipui ngaihdan lakna lam chi reng reng electronic media hmanga puanzar pawh khap tlat a nih tuh ECI thuchhuah chuan a tarlang bawk.