MLA inthlana ka din chhan bul ber chu eirukna, hlemhletna leh induhsakna uchuak tih bo a ni :Jeje Lalpekhlua

#ZabilianZ Nov 03: South Tuipui biala ZPM Candidate Jeje Lalpekhlua'n MLA inthlan a chuh ve chhan zawhna a dawn tam thu sawiin, a chhan tam tak zinga langsar ber chu eirukna, hlemhletna leh induhsakna uchuak tih bo a nih theihna tura beih a nih thu a sawi.

Jeje Lalpekhlua chuan Hnahthial-ah thuthar thehdarhtute kawmin he thu hi vawiin khan a sawi a. "Kan ram kalphung kan hria, Pathian leh mipui zarah MLA-a thlan tlin ka nih ve chuan kei chu eirukna, hlemhletna leh uchuak taka induhsakna te lakah ka fihlim ang" a ti.

Rethei, khawsak harsa leh kut hnathawktu ten an chanvo an chana, lei rem an rah ve chu a ngaihpawimawh em em a nih thu Jeje Lalpekhlua chuan a sawi a. Sorkarna an chang a nih chuan hemi kawnga hmalak chu a ngaihpawimawh hmasak a nih tur thu a sawi.

South Tuipui bialin hmasawn turin theihna a nei tha nia sawiin, Agriculture leh Horticulture lamah leh luipui hausakna Balu/Tiau-ah phei chuan Mizoram-ah lak chhuah tur nei tha ber an nih a rin thu sawiin, hei hi a ngaihpawimawh hmasak tur thu leh luipui hausakna Balu/Tiau lak chhuahna tur kawng awmsa chei thain, a thar laih a tul pawhin laih a nih tur thu a sawi.

South Tuipui bial-in ZPM MLA an nei a nih chuan District Development Committee leh khaw tinah Village Development Committee din a nih tur thu te, hetah hian VC te bakah party tin aiawh, NGO hrang hrang aiawh, Kohhran aiawh leh Prominent Citizen te an tel tur thu a sawi a. Bial mipui ten awlsam zawka MLA an dawr theihna turin Hnahthial-ah MLA Office hawn a nih tur thu te, bial mi dam lohna avanga hmunpui pantute tana awlsamna kawng ruahman a nih tur thu te a sawi.

Hnahthial leh a chhehvel khua ten power supply tha taka an hmuh theihna tura hmalak pawh a ngaihpawimawh thu Jeje Lalpekhlua chuan a sawi a. Zirna (Education) lamah pawh bial mipuite tana tha ber tura hmalak a nih tur thu te, zirna avanga Hnahthial pantu bial chhunga zirlai te tan Hnahthial-ah Hostel buatsaih tum a nih thu te a sawi.

Tui thianghlim in tur hnianghnar khaw tinin an neih theihna tura hmalak a tum thu te, hriselna (Medical & Health) lama mipui mamawh ngaihtuah te, thalaite hmasawnna leh eizawnna tur ngaihtuahpui te, hhualzin hip theihna tur dap chhuah te, thiamna bik nei leh talent nei thate eizawnna tling tura hmalakpui te pah a ngaihpawimawh leh a hmalakna tur an nih thu a sawi.

Hnahthial district tihpuitlinsaktute lawmthu hrilhin, Jeje Lalpekhlua chuan mamawh erawh tam tak an la neih thu leh district tihchangtlun zelna tura theihtawp a chhuah tur thu a sawi a. Sorkar department hrang hrangte tha taka an kal theihna tura hmalak a nih tur thu te, kum upa te ngaihpawimawh leh zual an nih tur thu te, sorkarna an chang a nih chuan thla tina kum upa ten pension an lak thin pawh Rs. 1000 a tihpun a nih tur thu te, kum pupa te inkawmkhawmna tur hmun te pawh buatsaih zel tum a nih thu te a sawi.

Ruihhlo do kawngah pawh nasa zawka hmalak a nih tur thu sawiin, bial chhung khaw hrang hrangah mipui punkhawmna tur Community Hall/Assembly Hall an nei tha lo pawh a vei thu leh hmalak hle a tum thu te a sawi a. Tuntum inthlanah thlan tlin a nih chuan a leh pekah chuan an hnathawh atanga vote a zawn tawh tur thu te a sawi bawk.