Zosap Missionary Mizorama awm hlen ta zinga dam rei ber Pi Vaili ropui takin vuiliam

#ZabilianZ Nov 15: Tun thlan ni 13-a chatuan ram pan ta Lakher Pioneer Missionary hnuhnungber Pi Violet Louise Annie Mark (Pi Vaili) chu vawiin khan a pian leh seilenna, Siaha district-a Serkawr (Saikao)-ah ropui taka vui a ni.

Pi Vaili hi Lakher Pioneer Missionary hmasaber Reginald Arthur Lorrain (R.A. Lorrain) leh Moud Louise Lorrain te fanu Louise Marguerite Tlôsaih Lorrain leh Albert Bruce Lorrain Foxall (A.B. Lorrain) te fanu neihchhun niin, kum 1938 April 16-ah Lorrainville, Serkawr-ah a piang-a, a pu Rev. R.A. Lorrain hi Mizorama chanchintha thlentu hmasa Pu Buanga (Rev. JH Lorrain) nau a ni.

R.A. Lorrain khan kum 1905-ah Lakher Pioneer Mission chu London-ah a din a, a nupui nen Mara mi te hnena chanchintha hril turin kum 1907-ah Serkawr an thleng. An tunu Violet Louise Annie kum 6 mi lek a nih lai kum 1944-ah Rev. RA. Lorrain chuan chatuan ram a pan a, a nupui Moud Louise Lorrain pawh kum 1960-ah a boral ve leh a, an nupa hian Serkawr-ah ve ve phum an ni.

Kum 1967-ah a pu (a nu nuta) Peter Richard pawh kum 1967 ah Aizawl-ah boral ve lehin, Dawrpui thlanmual-ah phum a ni a. A boral atanga kum 55-na kum 2022-ah a ruhro te lain, February ni 2, 2022-ah Lakher Pioneer Mission Compound, Serkawr-a an chhungkaw thlan-ah sawn a ni.

Kum 1968-a Vaili nu Louise Marguerite Tlôsaih Lorrain a boral ve leh hnu chuan Vaili leh a pa Rev. AB Lorrain chuan khawhar takin Serkawr-a an in chu an nghak ta a. Kum 1969-ah Mara tlangval L. Mark nen inneiin, a pasal Rev. L. Mark rawngbawlna chu puiin Mara mi te zingah rawng a bawl chhunzawm ta zel a, fa 4 (mipa 3 leh hmeichhe 1) an nei.

Kum 21-a a tlin kum, 1959-ah London-a Lakher Pioneer Mission Home Office Committee-in Vaili chu Lakher Pioneer Missionary-a chhiar tel tur a nih thu a puang a. Kum 1994 February ni 28-ah Congregational of New South Wales Moderator Rev Dr. F. Lambert Carter-a'n Serkawr Biak In-ah pastor ni turin a nemnghet bawk.

Rev. Violet Louise Annie Mark (Pi Vaili) hi kum 2008-ah Stroke avangin Siaha leh Aizawl-ah rei tak enkawl a ni a. Serkawr-a hawpui leh a nih hnu ah pawh damthat tak tak nei hleithei tawh lovin November ni 13, 2023 zing dar 8:10-ah Serkawr-a an chenna In atangin chatuan ram a pan ta a ni.

Mara te Nu tia an sawi hial Pi Vaili hi Mara mi a tam thei ang berin an thlahliam theihna tura ruahmanna siam niin, zan hnih chhung lumen a nih hnuah vawiin khan ropui taka vui a ni a. A hranpa ngata a kuang tur an siam tir, City Coffin, Aizawl te kutchhuakah zalhin a pi leh pu, nu leh pa te an lo zalh tawhna an chhungkaw thlanah rorelna ni nghaka hahchawl tura zalh a ni ta a ni.

Mara Autonomous District Council (MADC) sorkar chuan P Vaili hi ni 7 chhung sun a nih tur thu a lo puang tawh a. Vawiin a vui ni hi MADC huam chhungah chawlh puangin, MADC huam chhunga kohhran hrang hrangah a puala hun hman a ni bawk.