Raltlan Camp-ah kangmei chhuak, khawtlang, bialtu MLA, DM&R leh CYMA-in a tul angin hma la nghal
#ZabilianZ Feb 21: Zanin tlai dar 6 vel khan Sihhmui-a Ratlan Camp No. II-a chenna In 8 chu a kang a, mihring thi leh hliam erawh an awm lo.
Sihhmui khawtlang hruaitute hnen atanga thudawn danin, kangmei hi eirawngbawlna thuk atanga chhuak nia hriat a ni a. In 8 kang zingah In 5 chu engmah chuh hman loh in a kang a, In 3 atang chuan bungrua tlema zawng an chuh hman thung.
Sihhmui khua atanga Km 2 vela hlaa awm Raltlan Camp-a kangmei chhuak avang hian Sihhmui khawtlang chuan kangmei tuarte chen lailawkna tur an ruahman nghal a. Naktuk (February ni 22, 2024)-ah kangmei tuar te chenna tur sa in hnatlang ko nghalin, Sihhmui branch YMA-in kangmei tuar te tan vehbur khawn an tum bawk.
Sihhmui-a raltlan camp-ah kangmei a chhuak tih a hriat ve leh bialtu MLA TBC Lalvenchhunga pawhin kangmei chhuahna hmun a pan nghal a. DM&R Deptt. leh CYMA lam pawhin a tul tul buaipuiin hma an la nghal nia thudawn a ni a. Kangmei tuar te hi - Khawtaia; Pathanga; Hanchang; Laithanga; Pachawia; Bawisanga; Thangkima leh Pabiaka te chhung nia thudawn a ni bawk a ni.
Comments
Post a Comment