Vellore-a ruihhlo thawn tumtu nia hriat manin thubuai siamsak

#ZabilianZ Feb 22: Tun thla ni 19-a Vellore-a ruihhlo (Heroin) thawn tumtu nia hriat Lalrohlua (30), Durtlang Leitan Ramthar chu nizan khan man niin, vawiinah court-ah hruai a ni.

He thil thleng chungchanga Excise & Narcotics department thuchhuahin a tarlan danin, Excise & Narcotics duty ten tun thla ni 18 zan dar 8 khan a tuk ni 19-a Vellore kal tur mi pakhat hnen atangin mi thil thawn, a ken tur zing ami pakhat chu a rinhleh avanga a enfiah thu leh Heroin a lo  nih thu report an dawng a. An report dawn chu bawhzui nghalin, NDPS Act ’85 tlawhchhanin thubuai an ziaklut a.

Vellore kal tur mi pakhat hnena Heroin thawn tumtuin a thil thawn tura a phone number a tarlan atangin social media (facebook leh Instagram) lama a account te zawng chhuakin, kum 30 mi, Lalrohlua, Durtlang Leitan Ramthar a ni tih an hre zui a, nizan khan an man ta niin Excise & Narcotics department thuchhuah chuan a tarlang.

Hre lova ruihhlo kawltu nih chu buaina nasa tak tawh theihna leh chinfel harsa tak a nih avangin thil inthawn/inkensak thuah mitin fimkhur lehzual theuh turin Excise & Narcotics Department chuan an ngen bawk.