L Thangmawia'n ZPM anga insawifiah nasa la hre ngai lo - Ramthanmawia'n thu dik tawklo thudik sawi hmiah hmiahah CM a puh
#ZabilianZ Aug 26: MNF General Secretary, MLA hlui Dr. L. Thangmawia'n sorkar lai chungchang sawiin, "kum chanve awrh chauha hetiang em ema insawifiah nasa sorkar hi a awm ka la hre ngai lo", a ti.
He thu hi MNF party chhung inkhawm vawiina neihah Dr L Thangmawia chuan a sawi a. “An sorkar tirh khan Chief Minister-in 'Minister-te dept enkawl dan tur road map kan nei vek a, kan policy duan tawhsa angin an kal ang', a ti a. Amaherawhchu tun thlengin mipuiin an road map kan la hmu lo, an sawi loh ang zelin an kal,” a ti.
L. Thangmawia chuan Mizoram inthlanpui result zirchianna (mathematical analysis) atanga tehin MNF chu mipuiin an hnawl lo niin a sawi a. “Inthlan hnuhnung berah bial 13-ah chuan voter thar te nen kan vote hmuh percent a pung a, bial 22-ah MNF candidate ten inthlan hmasa aia sang zawk vote an hmu,” a ti.
"CM-in portfolio a nei lovang, designation plate tar ve lovang, restricted tender ti ve lovang, minister-te zin zui duah lovang, chhiah tipung lovang, party unit-in MLA fund an thawk lovang, work order cancel lovang, etc. bakah sum kan puk ve lovang an tih chu thla ruk chhungin Rs vbc 1949 an puk der tawh" L Thangmawia chuan a ti a. "Bangla a ngaiin kan chhawm ang, contactor chauhin hna an thawk ang, MLA hamthatna a chanve-in kan tihniam ang, tih te pawh an sawi loh ang zelin an kalpui" tiin, "khuallian sawisel nasatu an ni, mahse tunah hian nuam ti ber an ni a. CM adviser an sawisel thin, mahse adviser ngah ber an ni. Kum chanve awrh an la kal, hetiang anga insawifiah nasa sorkar hi an awm ka la hre ngai lo,” a ti.
L Thangmawia chuan “MNF hian insiamthat kan ngai" a ti a. "Ruling kan nih laiin a malsawmnaah kan lo tlu sual a ni thei, Pu Laldenga ten Mizoram hmakhua tur vision an neih te tihlawhtling turin ZPM chetsual chang lovin keimahni ngei hian theihtawp kan chhuah a tul,” a ti bawk.
He inkhawma thusawitu dang, MLA Ramthanmawia pawhin Mizoram Assembly thutkhawm ni hnih awh neih zawh tak chungchang sawiin, "Thla 8 sorkar hi Zoram mipuiin an hre tan mek a. Pawnlam atanga an insawi ang ngawt a ni lo tih chu anmahni ngei pawhin an inhre chho mek," a ti a. “Assam Rifles chungchangah CM-in AR leh Mizoram sorkarin MoU hran ve ve an ziak angin House-ah a sawi a, RTI chhannaah erawh AR-in MoU an duang a, Mizoram sorkarin a lo endik tih a ni. CM-in ka thusawi a dik zawk a ti te kha RTI zahawmna tihbawrhbanna a ni.” a ti.
Ramthanmawia chuan "Kan minister-te an inzir peih lo. Anmahni flagship program chungchang zawh belhna pawh an chhang hlei thei lo," a ti a. "I-Day khan CM chuan electric power man ba kan pe tla vek tawh a, rebate Rs vbc 35 chuang kan hmu let zawk, a tih kha Assembly session-a ka zawhna chhanna chu 'Electric bill ba Rs. vbc 134.90 a awm' tih a ni. Sasci Rs vbc 500 min lo pe tawh a tih pawh, ka zawhna chhanna chu - August ni 14 thleng khan release order kan la dawng lo, tih a ni. Kan CM hian thudik tawklo hi a thudik sawi hmiah hmiah thin," a ti bawk.
MNF sorkar laia covid vanga sum puk sawiseltute khan tunah (August 20, 2024 thleng khan) Rs vbc. 2046.19 an puk tawh niin Ramthanmawia chuan a sawi a. "Chhiah pawh an tipung zel dawn a, mipuite min hrek chho dawn. Healthcare-te hi a hmaa kan kalpui tho kha a hming thlakin MNF sorkarin a lo sualchhuah ADB loan project Rs vbc 1000 chu an nghak tawp,” a ti bawk a ni.
Comments
Post a Comment