Larsap-in LADC CEM tur a ruat - LADC Chairman-in mak a ti

#ZabilianZ May 02: Lai Autonomous District Council (LADC)-a Chief Executive Member (CEM) atana BJP MDC N. Zangura ruatna chu vawiin khan Larsap Gen. VK Singh-a'n a tichhuak a, hetih lai hian LADC Chairman T. Zakunga'n LADC-ah ZPM sawrkar a din reng laia CEM dang ruat a ni chu mak a tih thu a sawi ve thung.

LADC-ah sawrkar nghet a awm hleihtheih loh hnu ah kumin February ni 27 khan ZPM sawrkar dingin, V. Zirsanga chu CEM atan lakluh a ni a, March ni 17 ah Executive Member (EM) 9 pakua lakluh leh niin, April ni 17 atanga ni 22, 2025 chhung khan emergency session neiin budget pawh pass a. Hemi hnu April ni 23, 2025 khan MNF MDC 11 leh ZPM atanga BJP zawmtu MDC 2 bakah pawnlam atanga thlawptu Congress MDC 1 ten sawrkar an siam theih thu Larsap hnenah an thlen leh ta a, he thu kal zelah hian vawiin khan Larsap-in ECM atana N. Zangura a ruatna chu tihchhuah niin, sawrkar turin thlawptu a nei tam tawk em tih ni 10 chhunga fiah tura tih a ni.#zabilianznews

Hetih lai hian LADC-a ZPM sawrkar, V. Zirsanga kaihhruai chu thiah a la ni lo tih LADC Chairman T. Zakunga chuan a sawi a. Kumin February ni 24-a CEM atana V. Zirsanga ruat a nih atanga ni 30 chhunga thlawptu a neih dan fiah tura tih a nih thu leh fiah a nih theihna tura LADC session pawh koh ni mahse, session tan hmaa Chairman leh Dy. Chairman an ban avanga session neih theih a nih tak loh thu te a sawi a. Hemi chungchang hi Larsap hnenah pawh hriattir a ni chung leh LADC-a ZPM sawrkar a la din reng laia CEM thar ruat a ni chu hriatthiam harsa a tih thu a sawi bawk.

LADC inthlan hnuhnung ber kum 2020 December ni 4-ah khan MNF-in LADC-a bial 25 awmah bial 20 lain hneh takin an sawrkar a. Kum a vei hma, kum 2021, August ni 26-ah CEM Manghmung Chinzah kaihhrui LADC-a MNF sawrkar chu paihthlak niin, V. Zirsanga kaihhruai MNF sawrkar tho a ding leh a. Nikum 2024 ah MNF MDC engemawzatin an chhuahsan avangin MNF leh Congress party sawrkar intawm ding lehin Congress MDC C. Lalmuanthanga CEM a ni.#zabilianznews

MNF leh Congress sawrkar intawm hi kumin kumtir khan paihthlak leh niin, kumin February ni 27 khan a tira MDC pakhatmah nei lo ZPM sawrkar a piang leh a, LADC MNF sawrkar-a CEM lo ni tawh V. Zirsanga chu CEM a ni.

ZPM sawrkar pawh hi a nghet lo zui nghal ve ta tho a. MNF leh BJP tangdunin sawrkarna siam tumin hma an la a, pawn lam atangin Congress-in an thlawp bawk a. MNF leh BJP aiawh te chu April ni 23, 2025 khan Aizawl-ah inhmukhawmin joint legislature party leader atan ZPM atanga BJP zawm ta, M. Kawnpui bialtu MDC Pu N. Zangura an thlang a. N. Zangura hi Larsap chuan CEM atan a ruat ta a ni.#zabilianz #zabilianznews #zofatehuapzo