ZPM sawrkarin healthcare bill ba a pek zawng zawng MNF sawrkarin a lo ruahman sa atanga pek vek a ni :Dr. R. Lalthangliana

#ZabilianZ May 05: MNF Sr. Vice President Dr. R. Lalthangliana'n  "ZPM sawrkarin healthcare bill ba a pek zawng zawng chu MNF sawrkarin sum a lo ruahman sa leh dah sa atanga pek vek a ni" a ti.

MNF party pisa - Mizo hnam run, Aizawla MNF party chhung inkhawm vawiina neihah he thu hi Dr. R. Lalthangliana chuan a sawi a. MNF sawrkar kalta in SEDP atana a sum dah Rs vbc 150 atanga Rs vbc 40 chu sawrkar tharin healthcare ba rulh nan a hmang nia sawiin, hemi baka MNF sawrkarin healthcare bill pekna tur liau liau Finance deprtment-in fund allocation a lo pek sa Rs vbc 60 atangin engemawzat healthcare bill ba an rulh theih phah niin a sawi bawk.

Asian Development Bank atanga loan puk phalna MNF sawrkarin a tihfel tawh pawh tun thlengin a tak ram a la thleng lo niin Dr. R. Lalthangliana chuan a sawi a. "Harsa taka MNF sawrkar in approval a lo tihfel tawh, loan agreement ziah theih mai tawh tura peih tawh hi ZPM sawrkar hian bawhzuia, tihlawhtling ngei turin ka ngen duh a ni" a ti.#zabilianznews

Health Minister hlui Dr. R. Lalthangliana chuan sawrkar tharin Mizoram Universal Health Care Scheme (MUHCS) a kalpui pawh "AB-PMJAY duplicate (rawng var hi rawng engah an thlak) mai a ni" a ti a. "MUHCS phenah AB-PMJAY an phumru a, tuna cashless an tih hi kum 2019 atangin Central-in a kalpui daih tawh" tiin, MUHCS leh AB-PMJAY chu scheme thuhmun leh a kalphung leh healthcare bill dan pawh inang, a hming chiah hrang niin a sawi.

MUHCS chu mihausa tan chauhva duan nia sawiin, Dr. R. Lalthangliana chuan, "AB-PMJAY-in cashless nuai 5 package a keng tel a, chu package system chu MUHCS atan an entawn" a ti a. Entirna pakhat sawiin, rilphir zai chu MUHCS package-ah Rs. 11,000 a nih thu leh hei hian inzaina atana tul zawng zawng a daih vek tur a ni tih a nih laiin, a daih lo niin a sawi a. Package a nih chuan damlo in Rs. sing 2 seng ta se, Rs 11,000 baka cheng sing 2 a tlin loh na zawng chu bill theih a ni lo tih sawiin, MUHCS chu mihausa leh rethei inthliarna dik tak niin a sawi.#zabilianznews

MUHCS thar kalpui tura sawrkarin hma a laknaah rawn awm ngawih ngawiha ngaih - Private hospital te leh sawrkar hnathawk inzawmkhawm pawl (FMGE &W) te a rawn lo tih sawiin, "system felhlel leh buarchuar takin Mizoram Universal Health Care Scheme chu April ni 1, 2025 ah Chief Minister Lalduhoma'n a tlangzarh niin a sawi a. MUHCS-ah thil felfai tawk lo leh duhkhawp tawklohna tam tak a awm nia a lan thu sawiin, Dr. R. Lalthangliana chuan hei vang hian private hospital leh sawrkar hnathawk inzawmkhawm pawl te rawna siamthat thuai a tul thu a sawi bawk.

MUHCS chu package system a duan a nih avangin private hospital leh sawrkar hnathawk te pawhin an zawm duh lo niin Dr. R. Lalthangliana chuan a sawi a. Package rate te chu private hospital rate te nen khaikhin a inthlau em a, private hospital tan zawm a har dawn niin a sawi bawk a ni.#zabilianz #zabilianznews #zofatehuapzo