Vaivakawn-a ruihhlo ngai riakkhawm thin zinga za-a 80 chu chenna in nei an ni

#ZabilianZ July 17: Excise & Narcotics Commissioner Z. Lalhmangaiha'n ruihhlo ngai, Vaivakawn leh a chhehvela kalkhawma riakkhawm thin zinga za-a 80 vel chu chenna in nei, ruih duh avanga helai hmuna kalkhawm thin niin a sawi.#zabilianznews

Excise & Narcotics Minister Lalnghinglova Hmar hova Excise & Narcotics Deptt. hotute leh Vaivakawn Siamtha Pawl (VSP) te thukhawm-ah he thu hi vawiin khan Excise & Narcotics Commissioner chuan a sawi a. An zirchianna atanga a lan danin, Vaivakawn leh a chhehvela ruihhlo ngai kalkhawm thin zinga za-a 60 vel chu TBCC atanga chhuak niin, Hulhliap Project atanga chhuak za-a 5 vel leh a dang chu hmun dang atanga kalkhawm an nih thu a sawi.

Excise & Narcotics Minister hova thukhawm chuan ruihhlo ngai leh zu in mi ten Vaivakawn veng chu kalkhawmna leh riahkhawmna tura an ngai chu nunau leh khawtlang tana a him lo, tiin, titawp tura thawhho ni se, an ti a. Thawhhona bultanna atan Excise Minister chuan VSP hnenah Rs. sing 2 a pe nghal a ni.#zabilianznews

VSP hruaitute chuan an venga ruihhlo ngai kalkhawm thin chuan mipui himna a tiderthawng theia an hriat thu an sawi a. Rukruk leh inrawk pawh a tam phah hle nia sawiin, mi 200 chuang te an kalkhawm thin thu leh khawlaiah ualau taka inchiu te an awm fo avangin nunau tan pawh himlo an tih thu an sawi bawk.

Pawl hrang hrangin ei tur an pe thin chuan ruihhlo ngai pungkhawm a tih tam phah niin VSP chuan sawiin, ei tur pe tur chuan hriattir hmasa thin turin thuchhuah an siam hial tih an sawi bawk a ni.#zabilianz #zabilianznews #zofatehuapzo