#ZabilianZ July 03: ZPM party hruaitu ten tun thlengin ZPM party atanga minister leh MLA te eiruknaa hminghliau an la awm lo nia sawiin, eirukna tlem lamah Mizoram chu India rama pahnihna a nih thu an sawi a. "Eiruk tlem berna state ni thei tura tan lak zel ni se" an ti.
Vawiin - July ni 3, 2025-a ZPM party office bearer te Vanapa Hall, Aizawla thukhawmin resolution siamin, he thu hi an tarlang a. Sawrkar hna hrang hrang lakah pawh party induhsak bikna awm lovin dan anga lak thin nia sawiin, lawmawm an tih thu an sawi.
Pawisa pek lawk ngai lo (cashless)-a damlo enkawlna - Mizoram Universal Health Care Scheme (MUHCS) hlawhtlinna hmuh tur a awm chho zel nia sawiin, ZPM OB te chuan lawmawm an tih thu n sawi a. Sum harsatna avanga inenkawlna tha dawn ve phak loh thinna te pawh a reh chho zel nia sawiin, MUHCS hmang angkaitute an lawmpui thu an sawi bawk.#zabilianznews
Kuthnathawktute tan pawh sawrkar chuan a intiam angin hma a la nia sawiin, loneitu ten an thawhrim rah an seng thei ta niin an sawi a. Kum lo kal zel tur atan sawrkarin thlai thar lei dan tur ruahman tha zawk a siam nia sawiin, lawmawm an tih thu an sawi.
ZPM-in sawrkar a siam atanga ram leh hnam hmasawnna atana sawrkar hmalakna te chhuanawm an tih thu ZPM OB kalkhawm chuan an sawi a. Aikal lak tihtawp, office hun vawn dik, mumal taka sawrkar hnathawk hlawh leh bill pek chhuah te pawh sawrkar tha zawk siam tura hmalakna nia sawiin, heng hmalaknate avanga lawmawm an tih thu an sawi bawk.#zabilianz #zabilianznews #zofatehuapzo
0 Comments