Aizawl khawpuiah BJP MLA kan hmuh thuai ka beisei - hmasawn turin BJP hlau lova, kan thlawp a hun tawh :BJP Mizoram State President

#ZabilianZ May 08, 2026: BJP Mizoram State President Dr. K. Beichhua-a'n Aizawl khawpuiah BJP MLA hmuh thuai a beisei thu a sawi.

BJP political session vawiina neihah he thu hi Dr. K Beichhua chuan sawiin, AMC inthlan zawh taka Aizawl khawpuia huaisen taka BJP candidate-te an chhuan thu pawh a sawi a. "Aizawl khawpuiin BJP kan hmuh dan diklo avangin nasa taka diriam leh beih kan tâwk ṭhin" tiin, "Aizawl khawpuiah ngei hian BJP MLA te, AMC-ah ngei pawh BJP kaihhruaina kan hmuh vat ka beisei a ni," a ti.

Dr. K. Beichhua chuan "Mizoram hian eng nge kan mamawh?' kan tih chuan 'hmasawnna' a ni" tiin, "hmasawnna kan neihna tur chuan kawng pawimawh tak tak a awm thu a sawi a. Sorkar ṭha, sorkar huaisen, mirethei leh hausa thlei bik awmlohna leh rorelna dik kalpuite hi a ni," tiin BJP hlau lova, thlawp a hun tawh niin a sawi.

Dr K. Beichhua chuan Kristian MLA leh BJP State President a nih thu sawiin, "ka rinna pakhatmahin a hniam phah lo" a ti a. Politics din chhan hriat a pawimawh thu sawiin, "all round development hi khawi ah nge a awm, kan tih chuan a chhanna chu BJP a nih avangin BJP sorkar hi Mizoram hian kan mamawh hle a ni,"a  ti bawk.#zabilianz #zabilianznews #zofatehuapzo