Tihluihnaa inzawrhtir te chhanchhuah an nih avangin MHIP an lawm - pawikhawihtu ten an phu tawk hremna an hmuh theih nan hma an la dawn

#ZabilianZ May 12, 2026: MHIP Gen. Hqrs-in Mizoram Police leh Uttarakhand Police ten May ni 5, 2026-a an luhchhuah tak Rudrapur, Uttarakhand-a Beauty Queen Salon & Spa-a hmeichhia te inzawrhluihtirnaa mawhphurtute man an nih avanga lawmawm an tih thu an sawi.

MHIP chuan he thila mawhphurtu nia hriat Lalnunsiami (30), Kolasib, New Diakkawn leh pasal anga a neih, Beauty Queen Salon & Spa neitu Mohmmad (31), Bareilly, Uttar Pradesh, tuna Rudrapur-a awm mek te man an ni chu lawmawm an tih thu an sawi a. "Hetiang thil bawlhhlawha mahni Mizopuite hnukluttu hi kan dem tak zet a ni" an ti a, He thila mawhphurtute chu dan hnuaia an phu tawk hremna an hmuh ngei theihna tura theihtawpa hma an lak tur thu an sawi.

Phai lama hmeichhia hnathawk tura kal tum te lo fimkhur zual zel tura chahin, MHIP chuan "nu leh pa te pawhin kan fate, kalna chin leh an hnathawh te kan hriatpuia, kan lo him zel theih nan, Mizo zawng zawng te, khawtlang leh kohhrante pawh kan tanruala, Mizo hmeichhiate hetiang inzawrhna a inhnuhluh luihtirna laka, kan fihlim zel theih nan, Mizo hmeichhia zawng zawng leh Mizoram mipuite fimkhur tur leh tangrual tlang turin kan ngen a ni" an ti bawk.

Tarlan tawh angin, tihluihnaa state danga nawhchizawrhtir Mizo hmeichhia te Mizoram Police-in an chhanchhuak a, he thila mawhphurtute pawh man an ni a. Hemi chungchangah hian All Women Police Station, Aizawl-in tun thla ni 1-a Mizo hmeichhe pakhat hnen atanga FIR an dawn bawhzui nghalin, Special Investigation Team (SIT) dinin, Mizoram Police leh Women and Child Development Department hnuaia thawktu ten tun thla ni 4 khan Uttarakhand chu an pan a, a tuk ni 5 ah Rudrapur Police-te nen Mizo hmeichhiate thawhna hmun Beauty Salon & Spa chu luhchhuakin, Mizo hmeichhe 5 la hren beh te chu chhanchhuah an ni.#zabilianz #zabilianznews #zofatehuapzo