Tlabung Sub-District Hospital building thar hawng - MBBS 20 leh BDS 5 lakna tur sorkarin a buaipui mek

#ZabilianZ May 12, 2026: NABARD RIDF sum Rs. nuai 601.34 senga sak Tlabung-a Sub-District Hospital building thar chu vawiin khan Health Minister Lalrinpuii'n a hawng.

Health Minister chuan mipuiin ṭangkai zawka damdawi in an chhawr theihna turin a enkawl leh inrelbawlna lam a pawimawh thu sawiin, natna zawn chhuah hnathawktu laboratory lam te, damlo enkawltu nursing lama thawkte leh doctor te, eirawngbawltu bakah a tifaitute thlenga ṭha tak leh inpawh taka an thawhho a ṭul thu a sawi.

Tlabung Sub-District Hospital chu hmanraw ṭha zawk leh thawktu tam zawk nena thuam changtlun a nih chuan hmunpui pan ngai ṭhin tam tak chu enkawl theih an nih tawh dawn avangin mipui ten an chhawr ṭangkai lehzual thei dawn niin Health Minister chuan a sawi a. Mizorama doctor indaihlohna zualpui phuhrukna turin MBBS 20 leh BDS 5 lakna tura pawimawh te hmanhmawh taka buaipui mek a nih thu sawiin, mipui ten an chhawr ṭangkai zawk theihna tura District Hospital, Sub-District Hospital, CHC, PHC leh Medical College te tihchangtlun chhoh zel tum a nih thu a sawi bawk.

Sub-District Hospital Tlabung hi khum 30 awmna niin, Zothan Consultancy Services-in January ni 20, 2025 aṭanga hna ṭanin, February ni 3, 2026-ah an zova. A chhuat awh zau zawng square metre 824.73 niin, chhawng hniha sak a ni.#zabilianz #zabilianznews #zofatehuapzo