Excise leh CADS-in heroin gram 971 an man a - Saitual Police-in gram 587 an man

#ZabilianZ June 03, 2026: Excise & Narcotics Dept leh CYMA hnuaia Central Anti Drugs Squad (CADS) thawkdunin nimin khan Sihphir Neihbawi-ah Heroin gram 971 (hawng 67) leh he thila inhnamhnawih nia puh mi pali - Suwar Uddin Laskar (47), Basir Uddin Laskar (26), Rajghat/Bagha, Cachar, Assam ve ve; Daniel Malsawmdawngliana (47), Zokhawthar, Champhai leh Hifjul Bahar (27), Bhitargool, Karimganj, Assam nia inchhal te an man.

Excise & Narcotics Dept leh CADS te hian an mi man ten ruihhlo phurh kualna atana an hman lirthei pahnih - Hyundai Santro Car (MZ-01 D 8202) leh Bolero Car (AS-01 EU 9735) pawh an hrensak a. Heroin chu Zokhawthar atanga an lak, Assam-a tihral tur niin an mi man te chuan an sawi.#zabilianznews

Heroin vanga man te hi NDPS Act tlawhchhana thubuai siamsak niin, Special Court (NDPS Act), Aizawl District-ah hruai nghal an ni a. Thiamloh an chang a nih chuan kum 10 atanga kum 20 Jail tang tur leh cheng nuai 1 atanga nuai 2 thleng chawi tura hrem theih an nih thu Excise & Narcotics Dept hotute chuan an sawi.

Saitual DEF Special team te pawhin tun thla ni 1, zing dar 3 vel khan Keifang kualmawi-ah motor (Bolero Neo) MN-01 AX 0569 a chuang Nengshi Haokip (51), Salbung, Churachanpur, Manipur hnen atangin Heroin gram 587, Rs. nuai 117 leh sing 40,000 man hua chhut leh mobile phone an man a. Saitual Police Station-ah thubuai ziahluh a ni.#zabilianz #zabilianznews #zofatehuapzo