ZPM-in kum 1998 MLA inthlana vanduai tawh Rajya Sabha MP candidate atan ruat

#ZabilianZ June 03, 2026: Rorellai ZPM party Vice President C. Lalnunnema'n tun thla ni 18-a Mizoram aiawha Rajya Sabha member tur thlanna turah ZPM PAC Member Secretary leh Spokesperson K. Laltluangkima chu ZPM candidate atan ruat a nih thu vawiin khan a puang.

ZPM Vice President C. Lalnunnema chuan tun thla ni 2, 2026 zana ZPM - Rajya Sabha MP Nomination Committee thukhawmin K. Laltluangkima chu an candidate atan lungrual takin an pawm niin a sawi.#zabilianznews

ZPM Rajya Sabha MP candidate K. Laltluangkima chuan "Rajya Sabha MP pakhat chauh kan state-in kan nei a, kum 6 term a ni. Hemi chhung hian kan ram tana kan tih theih chin ang zawng zawng chu tih kan tum ang," a ti a. "Kei aia ṭha tam tak an awm a, kan thawkho zel ang" tiin, theihtawpa inzira hmasawn a tum thu a sawi.

Rajya Sabha MP hi mipui aiawha thlan MLA 40 ten June ni 18, 2026 zing dar 9 leh tlai dar 4 inkarah vote thlakin an thlang dawn a. Hemi ni vek tlai dar 5-ah vote chhiar nghal a ni ang.#zabilianznews

Upa Tlanghmingthanga (L) leh Darngeni te fapa K. Laltluangkima hi October ni 16, 1963-ah Saitual-ah a piang a. Kum 1990-ah Vanlalruati Khiangte nen inneiin, fa 4 (mipa 2 leh hmeichhe 2) an nei a. Mission Veng, Aizawl-ah an cheng mek a ni.

Bachelor of Commerce a zawh hnuah Trinity & All Saint College, Leeds atangin Christian Communication Studies a zo leh a. Maryland, USA aṭangin Master of Plumbing a zo leh bawk.#zabilianznews

Kum 12 chhung Synod Electronic Communication Dept-ah Manager hna a thawk tawh a. Mission Veng Branch YMA leh KṬP hruaitu ni tawhin, Synod-in a tihchhuah Kristian Naupang chanchinbu bulṭantu a ni.

Kum 1997-ah MNF (N) tuna ZPM party ni ta chu zawmin, Citizen Commons Front (CCF) atangin kum 1998 MLA inthlanah Bilkhawthlir dingin hnehna a chang zo lo a ni.#zabilianz #zabilianznews #zofatehuapzo