Four wheeler leh two wheeler taxi leh auto-rickshaw pawl aiawh ten Mizotaxi app hmanna tur thupek sut leh turin an ngen

#ZabilianZ June 02, 2026: Passenger phur chi lirthei pawl hrang hrang - four wheeler leh two wheeler taxi leh auto-rickshaw aiawh ten vawiin khan Transport Minister Vanlalhlana hmuin, State Transport Authority (STA)-in mobile application hman tir a tumna chu sût leh turin an ngên.

Mizoram Taxi Association (MTA), Aizawl Two Wheeler Taxi Association (ATTA) leh Aizawl District Auto Rickshaw Owner Association (ADAROA) aiawh te chuan man chawi lova hman theih application a awm laia hman man kumtin chawi ngai tur chu ṭha an ti loh thu Transport Minister hnenah chuan an thlen a. Mipui ten he application an hman man, chhiah an chawi ve a ngai tur pawh ṭha an tih loh thu an sawi.

Taxi leh auto-rickshaw ten STA rate an hman mek chu ennawn a nih loh chuan application chu hman chi-a an ngaih loh thu pawh Transport Minister hnenah chuan thlenin, Mizoramah internet network a la ṭhat tawk loh avangin mobile application chu lirtheia eizawng leh mipui tan harsatna thlentu tura an ngaih thu an thlen bawk.#zabilianz #zabilianznews #zofatehuapzo