#ZabilianZ June 08, 2026: Presbyterian Kohhran, Jubilee Hall, Venglai, Lunglei-ah nimin - Pathianni chawhnu khan -40 Days Healthy Lunglei Intensive Campaign- hnuaiah hriselna chungchang leh LushAI Healthy Lunglei App chungchang inzirtirna hun hman a ni a. KṬP member mi 70 chuang an kalkhawm a, kalkhawm te hriselna a thlawna endiksak an ni.
LushAI Healthy Lunglei app hmang hian district chhunga sorkar damdawi in leh health centre-a doctor te ṭhut hun tur a en theih bakah, OPD-a inentir turin appointment a siam lawk theih a. ABHA-a inziah luhna te, he app-a inziaklut damdawi dawr (pharmacy)-te aṭanga damdawi chah theihna te awmin, hriselna lama hriat tur pawimawh hrang hrang te pawh awlsam taka hmuh theih niin, OPD appointment laknaa pui thei tur leh zawhna hrang hrang Mizo ṭawnga chhang thei tur AI chatbot dah tel a ni bawk.
Lunglei Sub-Deputy Commissioner Lalnunchhani Hnamte-in healthy Lunglei hmalakna ṭha taka ṭawiawm tur te, hriselna kaihhnawiha tih tur leh tih loh tur te ṭha taka zawm tur leh LushAI Healthy Lunglei App chu hman ṭangkai tum ṭheuh turtein kalkhawmte a chah a. Urban Health & Wellness Centre (UHWC) Sethlun-a Medical Officer Dr Malsawmtluangi Khiangte leh Data Entry Operator K. Hmingthanmawia ten hriselna lamah leh LushAI Healthy Lunglei App chungchangah zirtirna an pe a ni.#zabilianz #zabilianznews #zofatehuapzo
0 Comments