Khawbel-in champion lai hnehin Mizorama volleyball inelna sangberah final an lut

ZabilianZ June 11, 2026

#ZabilianZ June 11, 2026: Mizoram Rural Bank Pro Volleyball League - mipa semi final-ah nizan khan Khawbel-in 22-25, 25-16, 25-18, 25-17 (3-1)-a Anastasia Electric Veng hnehin, final an lut ve leh ta a. Tunkar Inrinni zanah Hunthar nen champion nih an inchuh ang.

LPS Arena, Falkland-a semi final khelhah hian set hmasaber an hloh hnuah Khawbelin inkhel thunun tluanin, champion lai Anastasia Electric veng hnehin a vawikhat nan Mizorama volleyball inelna sangberah final an lut.

Tamil Nadu atanga an lakluh Angamuthu Ramaswamy chuan hmun pawimawh luah lehin vawi 43 a vawthla a, point 10 hlohin vawi thum a khelh tawhah Kuriz Player of the Match a ni vek.

Khawbel coach Eric Pautu chuan khelmual kotlangah team a kaihhruai hman loh avangin a nau Samson Pautu chuan inkhel pawimawh hi a hmachhawnpui a. Ke hliam vanga an khelh hnuhnungbera tel thei lo Lalhunthara'n a tir atangin a khel leh thei a, Lalremfela nen an thawhhlawk hle. A lai atanga lehlam hlap lo dangtute pahnih hi an elpui team dangte ngaihtuahin sang tawk lo ve ve mahse, Anastasia-in an hlawkpui thei lo.