Mizotaxi App hmang tur te Rs. 500-in renew ngai tawh lo turin eng hunah pawh inziaklut thei dawn

#ZabilianZ June 09, 2026: Lirtheia eizawng pawl pathumin Mizotaxi App hmang turin Rs. 500-a an inziahluh theih tur thu leh hei hi taxi/auto-rickshaw an neih chhung tihnun thar ngai tawh lova a nun tawh tur thu an sawi.

Mizoram Taxi Association (MTA), Aizawl Two Wheeler Taxi Association (ATTA) leh Aizawl District Auto Rickshaw Owner's Association (ADAROA) hruaitu ten Transport Minister Vanlalhlana leh State Transport Authority (STA) Secretary Er. Lalrammawia te hnena an duh dan an thlen hnu ah thuchhuah siamin he thu hi an tarlang a. Inziahluh theih hun chhung pawh bituk awm lovin, eng hunah pawh a inziahluh theih dawn niin an tarlang bawk.

MTA, ATTA leh ADAROA chuan rate chungchang an sawi leh terms and condition chhunga harsatna thleng thei thil nia an hriat te an lo en zui nghal tur thu STA lam chuan an lo hrilh niin an sawi a. "Harsatna awm thei reng reng chu chawp leh chilha enhova sawiho nghal zel a nih tur thu min hrilh" an ti bawk a ni.#zabilianz #zabilianznews #zofatehuapzo