MNF General Secretary-in MPSC-in hna lak a buaipuia thil dik tawk lo chhuia, a mawhphurtu chunga action la turin sorkar a phut

#ZabilianZ June 13, 2026: MNF General Secretary Lalremruata Chhangte-in tunhnai kum 1 leh a chanve chhungin Mizoram Public Service Commission (MPSC)-in hna lak a buaipuiah thil dik tawk lo a thleng tam hle nia sawiin, thil fello te rang taka chhui chhuaka a mawhphurtu chungah dan anga action la turin Mizoram sorkar a phut.

MNF party chhung inkhawm nimina neihah Lalremruata Chhangte chuan MPSC-in hna lak a buaipui chungchanga thil fel tawklo awm nia lang te a sawi a. MNF sorkar-in MPSC chhawng zangkhaia Group 'B’ (Non- Gazetted) leh a hnuailam lak leh promotion/departmental exam buaipui tura Mizoram Sub-Ordinate Service Selection Board (MSSSB) a din chu ZPM-in sorkar-na an chan tukah thiah nghal a nih avanga MPSC kuta hna lak kaihhnawih engkim a awm leh tak thu a sawi.

Chief Minister Lalduhoma intiamnaah engemawchen hmalakna awm mahse, MPSC hnalak thlirin hmasawnna a tam lo hle niin Lalremruata chuan a sawi a. "February ni 2, 2026 a MCS combined exam, 2025 result chhuakah tling tawh hnawl leh a ni a; May ni 13, 2026 a Junior Grade (MES) combined exam 2025 result chhuahah electrical & electronics engineering wing-ah MES pasarih lak turah pariat tihtlin niin, pakhat an paih leh a, hei hi top officer tura hna lakna a nih avangin thil diklo liantham tak a ni,” a ti.#zabilianznews

Lalremruata Chhangte chuan, "hna lakah sorkar a ṭang a, MPSC-in exam chi hrang hrang a buatsaih deuh reng a, a lawmawm hle rualin, MPSC chhawk zangkhaitu MSSSB a awm tal loh avangin pressure sang tak an hmachhawn tih a hriat" a ti a. Thil fel tawk lo langsar tak tak, tun hmaa la thleng ngai lo exam buatsaihah a thleng ta fo chuan mipuiin MPSC an rinna an hloh mai ang tih a hlauhawm thu sawiin, thil fello te chhui chiang thuai turin sorkar chu a phut a ni.

Sorkarin bungraw tam tham a lei dawna, a man leh quality check chungchanga dan hmanga endika, thlifimtu State Purchase Advisory Board (SPAB) chungchangah pawh thil thleng ngai lo a thleng nia sawiin, Lalremruata Chhangte chuan "June ni 10, 2026 ah notifiaction tichhuakin, Chairman ni reng ṭhin Chief Secretary an dah bo" a ti a. PWD hnuaia Rs. nuai 500 chin chunglam hnathawktu tur thlannaa mawhphurtu- endika pawma hnawl thei, State Works Advisory Board (SWAD) ah pawh chairman atangin CS dah bo nghal a ni" a ti bawk.#zabilianz #zabilianznews #zofatehuapzo