Pianphunga rualbanlo ramtuileilo leh kum upa te chetvelna hmanraw chi hrang hrang sem chhuak

#ZabilianZ June 09, 2026: Serchhip Bawrhsap leh Artificial Limbs Manufacturing Corporation of India (ALIMCO)-in pianphunga rualbanlote, ramtuileilo leh kum upa te chetvelna hmanraw mamawhtu mi 211 te hnenah ALIMCO siam hmanruate an hlan a. He hun hi Serchhip bialtu MLA, Chief Minister ni bawk Lalduhoma'n a telpui.

Chief Minister chuan, duhthlanna vang ni lo, pianpui harsatna te, fuke kima piang, vanduai zui ta te, kum a lo tam tak avang tea hmanrua engemaw nena nun tul te awm theih a nih thu sawiin, ALIMCO chu harsatna sutkianna tur hmanraw mamawh te siam tura sorkar laipuiin kum 1972-a a din a nih thu a sawi a. Mizoramah pawh office hawngin hma an la a, Serchhip district khaw hrang hrang ami te pawhin an zar an zo ta tih a sawi.

ALIMCO-in hmanrua an siam te chu a hlu hle tih sawiin, Chief Minister chuan Mizoram pumpui tuam chhuakin hma la thei se a duh thu leh Bawrhsap zawng zawng ten lo ngaihven se thaa a hriat thu a sawi bawk.

Serchhip district-a rualbanlo mi 28 leh kum upa mi 183, an vaiin mi 211 hnenah ALIMCO siam hmanraw chi hrang hrang 1427, Rs. nuai 19.25 sem chhuah a ni.#zabilianz #zabilianznews #zofatehuapzo