Social Welfare Minister-in hmeichhe naupang hmakhaw ngaihtuahna 'Project Thaichhawninu' a hawng

#ZabilianZ June 16, 2026: Beti Bachao Beti Padhao flagship hnuaia Mizoram Postal Division leh Women & Child Development Dept. tangkawp hmalaknaa hmeichhe naupang hmakhaw ngaihtuahna 'Project Thaichhawninu' chu Booth Mansion Conference Hall, Salvation Army Territorial Hqrs., Aizawl-ah Social Welfare, Women & Child Development Minister Lalrinpuii'n a hawng.

He project hming hi Mizo thawnthu pakhat Mauruangi leh Bingtaituki thawhnthu atanga lak niin, Mauruangi nu-in rethei tak chung pawha a fanu tana a inpe anga tunlai nu leh pa te pawhin Sukanya Samriddhi account hmanga an fanute hmakhua atana an inpek ve theihna tura he project hi duan a nih thu sorkar thuchhuah chuan a tarlang.#zabilianznews

Project Thaichhawninu hi Mizoram district 11-a RD Block 27, ICDS huam chhung khaw hrang hrangah te kalpui tura ruahman a ni a. He project hnuaiah hian hmeichhe naupangte chu Post Office leh State Bank of India kaltlangin account hawnsak theih an ni anga. Anganwadi Worker leh Postal Department a thawktu ten khawtinah awareness leh account hawn runpui an kalpui ang.

Ruahman lawk dan chuan thla 10 chhungin kum 10 hnuailam hmeichhe naupang 4050 ziahluh hman tum a ni a. Tunah hian Mizoram-ah hmeichhe naupang sing 1, sang 8 leh 560-in SSY account an nei tawh a ni.#zabilianz #zabilianznews #zofatehuapzo