Diklo taka pension lak a nih theihna turin kohhran pawhin diklo takin certificate an pechhuak thin : Accounts Officer (Pension Scheme)

#ZabilianZ July 31, 2026: District Treasury Office, Champhai-a Accounts Officer (Pension Scheme) R. Lalthantluangi'n diklo taka pension lak a nih theihna turin kohhran pawhin diklo takin certificate an pechhuak thin niin a sawi.

District Treasury Office, Champhai-in mahni duhthua pension payment order (PPO) sorkar hnena pekkir chungchang inhrilhhriatna vawiina a buatsaihah he thu hi Accounts Officer (Pension Scheme) chuan a sawi a. Diklo taka document pek chhuah chu dam bawhchhiatna a nih thu leh sim a tul thu a sawi.

Champhai district-ah pensioner 1361 awm mekin, sorkarin thla tin Rs. nuai 452, sing 2, sang 4 leh 491 a seng thin tih pawh Accounts Officer chuan a sawi a. Family pensioner 547 awm mekin, thlatin Rs. nuai 134, sing 3, sang 7 leh 331 sorkarin a seng thin tih a sawi bawk.#zabilianznews

Champhai Bawrhsap Mohammad Aaquib-a'n diklo taka pension la an awm tih sorkar-in a hriat thu sawiin, "diklo taka pension lo la thin te hian sorkar pawisa tam tak diklo takin an ei ral a ni" a ti a. Dik tawk lova pension an lak theihna tura lehkha pawimawh lem an siam thin avangin diklo taka pension lak tibo tur chuan sorkar hnathawk te chauh ni lo, khawtlang, kohhran, tlawmngai pawl leh mipui an pawimawh vek thu sawiin, diklo taka pension la te chu hun hawn chhunga PPO pekir vek turin a ngen.

Tarlan tawh angin Mizoram sorkar chuan September ni 30, 2026 thlengin diklo taka pension la ten an duhthua PPO an pekkir theihna hun a hawng a. Huntiam chhunga pekir te chu ngaihdam an ni ang a, pekir lo, man chhuah te chungah erawh chuan hremna lek a ni dawn thung a ni.#zabilianz #zabilianznews #zofatehuapzo