#ZabilianZ Aug 3, 2026: ZPM Adviser B. Lalchhanzova'n Jail hming thlak chu sorkar laipui thurawn anga state sorkar hmalakna niin a sawi.
Minister of State ni bawk B. Lalchhanzova chuan ZPM party chhung inkhawm vawiina neihah he thu hi a sawi a. India rama Jail te enkawlna danpui ‘Prisons Act, 1894’ chu a hlui tawh thu leh sorkar laipuiin kum 2023-ah dan thar siam tura model bill – ‘Prisons and Correctional Services Act’ a siam thu leh state sorkar te chu lo zirchianga, a remchan dan anga act thar siam tura thurawn a pek thu a sawi.
Mizoram sorkar pawhin sorkar laipuiin model bill a siam chu zirchiangin ruahmanna a siam ta tih sawiin, kum 2024-a Mizoram Legislative Assembly fur thutkhawmah ‘The Mizoram Prisons and Correctional Services Act, 2024’ pass a nih tak thu a sawi a. He dan thar hian Jail chu misual khungkhawmna hmun ni mai tawh lovin, mihring insiamthatna hmun ‘Correctional Home’ anga kalpui turin ruahmanna a siam thu a sawi bawk.
Tarlan tawh angin -The Mizoram Prisons and Correctional Services Act, 2024- ah chuan Directorate of Inspector General of Prisons chu Directorate of Prisons & Correctional Service tia thlak a ni a. Central Jail chu Central Prison & Correctional Home tih niin, Central Women’s Jail pawh Central Women’s Prison & Correctional Home tih a ni a, district Jail pawh District Prison & Correctional Home tih a ni ta bawk a ni.#zabilianz #zabilianznews #zofatehuapzo
0 Comments