#ZabilianZ May 09, 2026: Court order lem hmanga Lunglei district jail-a tang chhuah chungchang Mizoram Police-in thuchhuah siamin an sawifiah a. Jeremia Lalthangtura (25), Zemabawk, Berawlui veng, Aizawl leh C. Laltlanhlua (31), Republic vengthlang, Aizawl te chu he thila mawhphurtu bera ngaih an ni.
April ni 24, 2026-ah District & Sessions Judge, Lunglei Judicial District R. Lalduhawmi court-ah Lunglei District Jail UTP Judicial Custody-a awm mek - Malsawmtluanga leh Dokapthanga te chu inlanin, April ni 13, 2026-a Court of District & Sessions Judge, Lunglei Judicial District lehkha leh April ni 10, 2026-a Gauhati High Court lehkha - April ni 24, 2026-a court hearing nei tur leh Rs 50,000 fine-a discharge bond-a an chhuahna tur order an keng a. Heng mi pahnih te hi a hma ni - April ni 23, 2026-ah R. Lalduhawmi court-ah tho hearing neiin, an hearing neih leh hun tur pawh May 8, 2026 ruat a nih bawk si avangin R. Lalduhawmi chuan ringhlelin District Jail, Lunglei-ah thil awmzia chhui chiang turin a kal ta a. Malsawmtluanga leh Dokapthanga te bakah lehkha diklo hmanga jail tang (convict tawh) chhuah an awm nual nia a lan avangin April ni 27, 2026-ah Lunglei Police Station-ah FIR a thehlut ta a ni.
Lunglei Police-in FIR-a tarlan mi 15, document diklo hmanga chhuah tawh te zawn hna an thawk nghal a, mi 11 chu man lehin, District Jail-ah dah leh nghal an ni a, pakhat a thi tawh a, Khawzawl Police-in an lo man pakhat awm bawkin, mi 13 te chin chu hriat nghal a ni a. He thil chhui zuina atangin document lem hmanga chhuah te hi mi 17 an ni zawk tih leh POCSO case, ND&PS case leh rukruk case-a convict tawh te an ni hlawm tih hriat zui a ni bawk.#zabilianznews
He thila mawhphurtu ber nia lang Jeremia Lalthangtura (25), Zemabawk, Berawlui veng, Aizawl, Lunglei District Jail-a tang leh C. Laltlanhlua (31), Republic vengthlang, Aizawl, Dictrict Jail, Lungleia a nghet lova ambulance driver te chu an inhnamhnawih ngei nia hriain, May ni 1, 2026 khan man an ni a, May ni 7, 2026 khan District Jail, Lunglei-ah dahluh an ni.
Police thuchhuahin a tarlan danin, he thil an chhuizuina atangin Jeremia Lalthangtura hian convict mi 17 te chu bumin, an case-ah appeal a siamsak theih thu leh a hmelhriat Ukil a biaksak tur thu tiamin pawisa a laksak thin a. Rs. 4,000 atanga Rs. 50,000 thlenga laksak thinin, a pawisa lak hi Rs. 1,35,000 vel a ni. An pawisa hmuh te hi Jeremia Lalthangtura leh C. Laltlanhlua te hian an lo insem thin tih hriat chhuah a ni bawk.
Pawisa te hi C. Laltlanhlua kutah emaw a gpay account-ah a lut thin a, C. Laltlanhlua phone leh banking transaction zawng zawng chu a remtihnain Jeremia Lalthangtura chuan Jail chhung atangin a hmansak thin.#zabilianznews
Document siamchawp te chu C. Laltlanhlua'n Jail thuneitute hnenah a pe thin a. Document lem siamna atana hman computer leh printer te chu man niin, Forensic Science Laboratory-ah thawn nghal a ni bawk.
Court order lem hmanga jail tang mi 17 chhuah te hi January ni 30, 2026 leh March ni 18, 2026 inkara chhuah an nih thu leh he thubuai hi chhui zui zel a nih thu Police thuchhuah chuan a tarlang bawk a ni.#zabilianz #zabilianznews #zofatehuapzo
0 Comments