Minister-in NCC Fest & Parasailing Camp a telpui

#ZabilianZ May 09, 2026: 2 Mizo Battalion National Cadet Corps (NCC) bultuma C. Ṭhuamluaia Mual, Lungleia neih Mizorama NCC Fest & Parasailing Camp hmasaber chu vawiin khan Minister Lalrinpuii'n a telpui.

Minister Lalrinpuii chuan Mizorama NCC Fest & Parasailing Camp hmasaber Lungleiin a thleng leh a tel ve thei chu lawmawm a tih thu a sawi a. Viksit Bharat 2047 hlawhtlinna turin Mizoram sorkar-in mipui sorkar, sorkar ṭha leh langtlang kalpuiin state chhunga hmasawnna rualkhai a awm theihna turin theihtawp a chhuah niin a sawi a. Lungleia Mizoram State University din tura ruahmanna leh hmun hrang hranga hmasawnna hnathawh kal mek te, Mizorama NCC Fest & Parasailing Camp hmasaber chhim lama buatsaih te chu a nemnghettu a nih thu a sawi.

Viksit Bharat 2047 hlawhtlinna chu ṭhalaite, miretheite, hmeichhiate leh kuthnathawktute-ah a innghah thu sawiin, ram hmasawn nan ṭhalaite tihchak leh tihhmasawn a pawimawh thu leh NCC chu chumi atana hmanraw ṭha ber pakhat a nih thu a sawi bawk.

NCC Fest & Parasailing Camp-ah hian NCC Alumni, NCC leh ṭhalaite tana thawhhlawk tak tak leh ram pum huapa mi hmingṭhate chawimawi an ni a. Tun thla ni 5 aṭang khan 2nd Bn MAP ground, Luangmualah Parasailing Camp kalpui a ni tawh bawk a ni.#zabilianz #zabilianznews #zofatehuapzo