Mi awmpui zingah humsual dai leh harsatna dang tawk an tam

#ZabilianZ May 10, 2026: Hmeichhia, humsual dai leh harsatna dang tawk zingah mi in-a awm - awmpui - (domestic worker) an tam a. Mizorama mi awmpui zingah tiduhdah tawk awm ve bawk mahse, ramdang ang erawh chuan an tam lo thung.

Centre for Development Initiatives-a Field Animator Zodinpuii'n a sawi danin, Mizoramah tawngkam leh engemaw hmanga awmpuite hmuhsitna lam rawngkai awm ve mahse, a tlangpuiin awmpui zingah tihduhdah tawk an awm tam lo hle a. Awmpui mamawhna sang hle mahse, mi nawlpuiin an dahhniam  avangin mi fel tak takin an thawk duh lo nia sawiin, una awmpui tam ber pawh thingtlang lam leh tlema hnam hnuaihnung lam an ni ber niin a sawi.

Centre for Development Initiatives buatsaih awmpuite himna chungchang sawihona atanga a lan danin, Aizawl-ah mi in-a awm - awmpui - mi 5000 chuang an awm a, an zinga a tam ber chu thingtlang lam mi nia hriat a ni. Tunhma lam chuan Mizorama awmpui tam ber chu khawchhak lam, Myanmar mi an nih thu te, chung mi te chu kum tam tak Mizoramah awmin kan tu leh fa te an awm tlei thu leh tunhnaiah awmpui mumal leh rei tak kawl a harsat tawh thu te sawihona ah chuan sawilan a ni.#zabilianznews

Zodinpuii chuan kum 2005 atangin awmpuite chungchang an buaipui tan thu leh hmeichhe humsual dai leh harsatna tawk zingah awmpui an tam tih an hmuh thu a sawi a. Mi awmpui te chu an dikna chanvo bakah an hamthatna tur te an hrilh thin thu sawiin, Champhai lamah pawh hma an lak leh mek thu a sawi.

LESDE Secretary Dr. Lalhriatzuali Ralte-in awmpuite dikna chanvo humhalhsak a tul thu sawiin, "anmahni humhimtu dan a awm loh avangin anmahni chhanhimna tur a ngai a ni,” a ti a. Domestic worker-te tan minimum wage thar chhuah thuai tum a nih thu a sawi bawk.

Mizoram Youth Commission (MYC)-in hna zawngtu leh ruaitu inkara awlsamna siam tura a ruahmanna hnuaiah April ni 24, 2026 thleng khan awmpui tur atan nula 59 an inziaklut tawh a, heng mi te hi a ruaitu tur te nen intiamkamna ziahpui niin, an zinga psarih chu hna an hmuhsak tawh a ni.#zabilianznews

Hmeichhia, harsatna tawk ten an pan turin Women & Child Development Department-in ‘Shakti Sadan’ an nei a, hmeichhe baihvai, harsatna tawk, tlukluhna leh belh tur mumal nei lo tan pan theih a ni a. Women Helpline No. 181-ah engtiklai pawhin biak theih an ni.

Tunhma deuhah Mizorama awmpui tam ber chu khawchhak lam mi an ni thin a, a hnu deuhah Tripura lam an tam leh a, tunhnai chhovah thingtlang lam leh Bru an tam nia hriat a ni a. Awmpui chu chi hnih - riah chilh leh lânga kal an awm a, riah chilhin a tlangpuiin Rs. 6,000 atanga Rs. 8,000 inkar an hlawh a, langa kalin ni khatah Rs. 250 atanga Rs. 500 inkar an hlawh tlangpui thung.#zabilianz #zabilianznews #zofatehuapzo