#ZabilianZ July 14, 2026: Nizan dar 11 vel aṭanga tukin zingkar thlenga Ṭawipui South-a leimin chu vawiin khan Lunglei District Disaster Management Authority (DDMA) atangin Zonal Officer Grace Lalremdiki Sailo hova enfiah a ni a. Lei a la tlak belh reng avangin leimin thenfai hna thawh pawh a him rih lovah an ngai.
He leimin hian chenna in, hotel leh dawr te hnawlin, Lunglei leh Lawngtlai inkar kawng national highway-54/2 chu a hnawh a. Enfiahtu ten leivung paih fai hmaa lung lian leh nghet lo zual hal darh phawt an rawt angin Lunglei DDMA Chairperson Navneet Man chuan Asst. Controller of Mines, Geology & Mining, Lunglei kaihhruainaa naktuka hal darh turin vawiin tlai khan thupek a chhuah nghal.#zabilianznews
Leimin enfiahtute hian leimin tuar te pawh tlawhin, sorkar aṭanga ṭanpuina leh chhawmdawlna awm thei te ruahmansakin, an bawhzuisak nghal a. Khualzin tangkhangte ei leh in siamsakna leh senso dang phuhrukna turin Ṭawipui South VC leh YMA hnenah Lunglei DDMA aṭangin Rs. sing 2 an hlan nghal bawk.
Ṭawipui South-a leimin enfiahnaah hian Geology & Mining Department, Lungleia Asst. Controller of Mines Er Lalnunsiama Fanai, ABCI General Manager Akhilesh Singh leh official dang te bakah Ṭawipui South VC leh YMA aiawh te, DDMA Quick Response Team member-te leh Police aiawhte an tel a. Kawng a tlang theih hun tur sawi theih a nih loh avangin Lunglei DDMA hotute chuan khualzinte fimkhur tur leh ṭul lova hun leh tha sen ral a nih loh nan helai paltlang tura zin chhuak rih lo turin mipuite an ngen a ni.#zabilianz #zabilianznews #zofatehuapzo
0 Comments