#ZabilianZ July 23, 2026: Bangladesh-a tribal chimral mekin Mizoram a nghawng theih dan leh Chittagong accord chungchangah vawiin khan The Zozam Times chanchinbu-in I&PR Auditorium, Treasury Square, Aizawlah Seminar an buatsaih a. Home Minister K. Sapdanga leh MLA, Adviser to CM ni bawk Lalmuanpuia Punte ten an telpui.
Seminar hmanpuitu Home Minister chuan Bangladesh tlangram atanga Mizorama rawn tlanchhia Zofa te leh midang te pawh engtia lo dawnsawn tur nge tih ngaihtuah a ngai ta hle tih a sawi a. Bangladesh tlangrama Zofa cheng te chu Muslim ten an chenna an luahlan mek avangin himna zawngin an tlanchhe ta tih a sawi.#zabilianznews
Bangladesh atanga nawrchhuah zingah Chakma leh Bru te pawh an tel thu K. Sapdanga chuan sawiin, kohhran ten chhandam ngai an nih ve tho hriaa an lo enkawl thu leh tlawmngai pawl leh political party te pawhin ram himna ngaihtuah chunga an lo dawnsawn thu a sawi a. He seminar hi sorkar, hnam, kohhran leh tlawmngai pawl te tan pawha ngaihtuahna mit tikeutu a nih a beisei thu a sawi bawk.
The Zozam Times Editor Tuikhuahthanga kaihhruai seminar-ah hian Mizoram University-a Associate Professor Dr. Lalrinnunga Hmar chuan thupui sawihawngin, Pachhunga University-a Associate Professor Dr. Lalthlamuana Ralte kaihhruaiin sawihona hun hman a ni bawk a ni.#zabilianz #zabilianznews #zofatehuapzo
0 Comments