WC semi-final ah WC vawi 17 khel pha ve ve tawh - vawi 2 champion tawh leh vawi 1 champion tawh France leh Spain inhmachhawn dawn

#ZabilianZ July 14, 2026: Zanin (naktuk zing) dar 12:30-ah FIFA World Cup Semi-Final an khel tan dawn a, semi-final hmasazawk khel tur France leh Spain hi vawi 38 lo inhmachhawn tawhin, Spain-in vawi 18 hnehna changin France-in vawi 13 hnehna an chang a, vawi 7 an inhnehtawk bawk.

FIFA World Cup bikah 2006 khan knockout stage-ah inhmachhawnin 3-1 in France an chak a. France leh Spain an intum hnuhnungber chu nikuma UEFA Nations League semi-final ah niin, hemi tum hian 5-4 in Spain an chak a ni.#zabilianzsports

France hi Europe atanga World Cup hmasaber 1930-a khel ram pali zingah telin, hemi tum hian 4-1 a Mexico an hneh chu world cup-a hnehna an chan hmasakber a ni a. Tuntum hi vawi 17 world cup an khelhna a ni.

1938-a world cup an thlen hnuah 1998-ah thleng lehin, an champion a, 2018-ah champion lehin 2006 leh 2022 ah te pahnihna an ni a, 1958-ah 3-na niin, 1982 leh 1986 ah te semi-final an thleng a, tuntumah semi-final an khel leh dawn.#zabilianzsports

Tuntumah hian an match hmasaber-ah 3-1 a Senegal hnehin, 3-0 a Iraq an hneh leh hnuah 4-1 a Norway an hneh a. Round of 32 ah 3-0 in Sweeden an hneh a, round of 16-ah 1-0 a Paraguay an hneh leh hnuah quarter-final ah 2-0 a Morocco hneh lehin semi-final an lut.

France hian tuntum world cup-a goal 8 khunga, goal 8 khung tawhtu dang Lionel Messi nen tuntum world cup-a goal thun tam ber ni mek Kylian Mbappé an kawl a. Mbappé hian 2018, 2022 leh tuntumah world cup khel mekin, world cup-ah goal 20 a thun tawh a, goal 21 thun tawhtu Messi dawt chiahah a awm mek bawk.#zabilianzsports

Spain : Kum 1934-ah world cup khel tanin, quarter final an thleng a. 1950-ah palina an ni a, 2010-ah an champion.

France ang thovin tuntum hi world cup vawi 17 an khelhna a ni a. 1982-ah a thlengtu an ni. World cup hnuhnungber 2022-ah round of 16 an thleng.#zabilianzsports

Tuntumah hian group stage-ah Cabo Verde nen goal awm lovin, an inhnehtawk a, 4-0 a Saudi Arabia hnehin, 1-0 in Uruguay an hneh. Round of 32 ah 3-0 in Austria an hneh a, round of 16-ah 1-0 in Portugal an hneh leh a, quarter-final ah 2-1 a Belgium hneh lehin semi-final an lut.

Spain forward nimina kum 19 tling chauh, group stage-a Saudi Arabia laka goal khat khungtu Lamine Yamal chu tumtum world cup-a player ngaihven hlawh zing ami a ni a. World cup vawikhat khelhna bawk, goal 4 thun tawhtu Mikel Oyarzabal an nei bawk.#zabilianz #zabilianznews #zofatehuapzo