#ZabilianZ July 24, 2026: Electric veng Branch YMA, Aizawl-in an member C. Lalremruata'n thisen unit 100 a pek tlin lawmpui nan leh chawimawina atan vawiin khan Electric veng YMA hall-ah thisen pek runpui an buatsaih a. Hetah hian C. Lalremruata chuan Mizorama unit tling ngeia thisen vawi 100 pe hmasaber record siamin, Electric veng branch YMA member 100 (mipa 94; hmeichhia 6)-in thisen an pe a ni.
He hun hmanpuitu Health Minister Lalrinpuii chuan lawmpuina thuziak leh pawisa hlanin, C. Lalremruata’n unit tling ngeia vawi 100 thisen a pe thei chu ropui a tih thu a sawi a. "Midang ṭanpui leh nun chhanna tura thisen vawi 100 a pek theih avangin zahna chibai ka buk a ni" a ti.#zabilianznews
Electric veng YMA President C. Lalnunfela pawhin, "vawiin hi Electric veng tan ni chhinchhiahtlâk a ni" tiin, Mizorama thisen unit tling ngeia vawi 100 pe hmasaber an member C. Lalremruata an chhuan thu a sawi.
Bialtu MLA, Home Minister K. Sapdanga pawhin C. Lalremruata leh Electric veng branch YMA te thil tih chu ropui tiin, lawmpuina Rs. 15,000 branch YMA kutah a hlan bawk.#zabilianz #zabilianznews #zofatehuapzo
0 Comments